Aurrekontu proiektutik kendu ostean 2014-01-31

Gasteizko Udalak eutsi egin dio Arabako Elkartearekin duen hitzarmenari

Azkenean, Gasteizko Udalak eutsi egin dio Arabako Bertsozale Elkartearekin zuen 50.000 euroko hitzarmenari. Marotoren gobernuak (PP) partida hori kendu egin zuen aurrekontu proiektuan eta EAJ-rekin hitzartutako zuzenketen ondoren etorri da aldaketa. Hitzarmen hori da Gasteizko bertsolaritza proiektuaren oinarria.

"Proiektu guztia jokoan"
Bigarren urtez egin du Gasteizko Udalak jokaldi bera, eta gogor salatu zuen Arabako Bertsozale Elkarteak, bertsolaritza proiektua trukeko txanpon gisa ez erabiltzeko eskatuaz. Hitzarmen horren baitan daude “Gu ere bertsotan” proiektuan Gasteizko 9 ikastetxetan, 900 haurrekin ari direna lanean; Arabako 2014ko Kuadrilla artekoan bat-bateko 5 talde Gasteiztar arituko dira kantuan, 8 bat taldetxok bertso jarrien sailean parte hartuko dute, 100 bat lagun denera; bertso-eskolan 3 talde daude martxan; Gasteizko jaietako Aihotz plazako saioak hala nola udal liburutegi sarearekin eta bestelako kultur eragileekin elkarlanean abiatutako ekimenak

Oso ondo baloratutako proiektua
Arabako Bertsozale Elkartearen hitzetan, "32 urte luze hauetan euskararen berreskuratze prozesuaren eskutik joan da beti bertsolaritza, ekarpena egin diogu eta bertatik edan dugu, elkar elikatu dugu, elkarren beharra dugu. Besteak beste, bertsolaritza Gasteizen transmititu eta sustatzeko proiektua gizarte mailan oso ondo baloratua dago, adin guztietako euskaldunek aisia eta astialdian euskara erabiltzeko, hizkuntzaren kalitatea handitzeko eta euskaraz gozatzeko proiektu oso bat eskaintzen duelako, integrala, euskararen ekosistema erabat aberastuz, eta euskaldunen komunitatea elkarreraginean jartzen lagunduz. "

• 
•