Bertso-jaialdia Donostiako Lugaritzen 2014-11-27

Umorearen aldaera ezberdinetan

Erabat  umoretik jo du aurten Lugaritzen osatu den bertso-saioak. Horren errudunetako bat gaijartzailea izango zen noski, Josu Goikoetxea, baina baita bertsolariak ere, hauek erabakitzen baitute askotan bertsoaldi bakoitzaren tonua. Amets Arzallus, Andoni Egaña, Uxue Alberdi eta Beñat Gaztelumendi izan ziren kantuan. Eta entzuleek, Lugaritz bete zuten 250 lagunek, oso ondo pasa zuten eta eskertu zieten bertsolariei.

Aurretik Antiguotarrak elkartean bildu ziren parte-hartzaileak afaritan eta hango baratzuri-zopak eraginda-edo bizi bizi hasi zen saioa ere.  Agurrak bota eta lehenengo bertsoaldia (berotzeko izaten den hori) afariari buruzkoa izan zen; dagoeneko ez zegoen berotu behar handirik.

Hortik aurrerako bertsoaldi ia denak umoretik joan ziren. Akaso lehenengo ofizioa? Edo Albako Dukesaren inguruan Gaztelumendi eta Egañak egindakoa? Baina ez, hori ere oso seriotik ez.

Hori bai umore klase desberdinetatik, zuzen eta ironikoagoetatik, umorerik absurdo edo surrealistarenera. Uxue Alberdik eta Andoni Egañak “Lili Marleen” doinuan (izen ofiziala "Zelaia" ikusi dut) egindakoa adibide nabarmena. Gaia ere halakoxea. Andoni senarrak telepatia gaitasuna duela-eta,  Uxue emaztea aluminiozko paperaz egindako txano batekin agertu zaio. Andonik kezkatuta dago Uxuek zerbait ezkutatu nahi ote dion pentsatuta. Ordurako "barrerak" jaitsita ziren saioan eta alanbre finaren gainean bertsolariak, txiste korapilatu samarrak entzuteraino.

Bakarkako lanik aipagarrienak ere, Egañak eta Alberdik egindakoak, umoretsu joan ziren. Lehenak hamalauko berdinean, zazpi puntuz beraz, hiru bertso. Eta bigarrenak bost zortziko txikirekin borobildu zuen bere lana.

Antzeko bidetik joan ziren Beñat Gaztelumendik atzeko pisukide ohiei leporatutakoak eta hauen erantzunak. Edo elkarri puntuak jartzen Gaztelumendik eta Arzallusek kantatutako bertso biziak.

Beste behin ere, primerakoa izan da Lugaritzeko saioa. Antolaketak, jendearen erantzunak, bertsolarien jarrerak, guztiak ahalbideratu du saioa sueltoa, naturala eta gozagarria ateratzea. Hurrengo urtetan berriro.

• 
•