Amasa-Villabonan 2014-12-16

Bertso-bisita Mintzola ahozko lantegian

Abenduaren 4an egin zuten bertso-bisita Euskararen Eguneko egitarauaren baitan. Amasa-Villabonako Subijana-etxean dago Mintzola ahozko lantegia eta herritarrei erakutsi asmoz antolatu zuten ekimena Euskal Herriko Bertsozale Elkartea, Mintzola Fundazioa eta Amasa-Villabonako Udalaren artean.

Jexux Mari Irazu eta Beñat Gaztelumendi izan ziren bertso-gidari eta eraikinaren lehen pisuan bertsolarien agurrekin eman zioten hasiera bisitari. Aretoan jarraitu zuten bertsotan baina orduan bertsolariek izan zuten euren gidaria, Oihana Iguranek egin baitzituen gai-jartzaile lanak. Baina ez berak bakarrik, Amasa-Villabonako bertso-eskolako ikasleek estu hartu zituzten bertsolariak erantzuteko hainbat puntu jarriz.

Subijana-etxea, bilketa-lana, desafioak... izan zituzten bertsogai han eta ondoren, eraikinaren ganbarara igo ziren denak bertso-bisitaren bigarren zatia osatzera. Xenpelar Dokumentazio Zentroa eta bere jardunak hartu zuen protagonismoa bertan. Besteak beste, azkena bildu den bertso-doinua eta Hiztegi Errimatua izan ziren bertsotarako aitzakiak.

Bertsolari Txapelketetako txapel gehienak Amasa-Villabonatik igarotzen dira; bertako jostun batek josten baititu. 2015ean Gipuzkoako Bertsolari Txapelketa jokatuko denez, jostunak lantxo bat jarri zion Oihana Iguarani: Jexux Mari Irazu eta Beñat Gaztelumendiren buruen neurriak hartzea. Saio polita osatu zuten puntutan.

Giro ederrean eman zioten amaiera bertso-saio bereziari mokadutxia janez.

• 
•