Historikoa 2015-01-23

Bertsolari Egunetik Bertso Egunera

 Bertsolaritzan pisu handiko ekimena da Bertso Eguna gaur egun. Urtarrilaren 31n ospatuko da aurtengoa, Donostian. Hala ere, historian soka luzeko ekitaldia da.

 Bertsolarien omenaldia hasieran

 1968an ospatu zen lehenengo Bertsolari Eguna, Manuel Olaizola "Uztapide" omentzeko asmoz. Donostiako Udalaren CAT/KTEren laguntzaz arduratu izan da egun hau ordutik. Lehenengo lau edizioak Astoria Antzokian egin ziren, eta Carmelo Baldan eta Anoeta Pilotalekuan ondoren.

 Urtero-urtero bertsolari bat edo gehiago omendu zituzten: 1969an Xalbador, 1970ean Manuel Lasarte (hurrengo urtean ospatu zen egun hau, garai hartan Salbuespen Egoera indarrean zegoelako), 1972an Mattin Treku, 1973an Iñaki Eizmendi "Basarri"...

 1980an etena

 1979an entzuleek, boto bidez, Imanol Lazkano aukeratu zuten hurrengo urtean omendua izateko. Azpeitiarrak, ordea, 43 urte baino ez zituen orduan, eta ez zuen omenaldirik nahi izan. Botoetan bigarrena Etxahun Iruri geratu zen, baina omenaldi eguna baino lehenago hil zenez, azkenean ez zen omenaldirik egin.

 Ondorioz, hortik aurrera omenaldiak nori egin erabakitzeko batzorde bat antolatu zen. Bertsolari Elkartea (gerora Bertsozale Elkartea) sortu zenetik, berak hartu zuen erabaki hori hartzeko ardura.

 1994an lehenengo Bertso Eguna

 1994an, Bertsozale Elkarteak hala erabakita, Bertsolari Eguna Bertso Egun bilakatu zen, omenaldien bidea alde batera utzita. Urte horretan sortu zen gaur egun ezagutzen dugun formatua.

 1991ko historikoa

 Bertsoan ikusgai jarritako bideo honetako irudiak 1991ko Bertsolari Egunekoak dira. Urte hartan Patxi Iraola eta Florentino Goiburu omendu ziren. Afalosteko saioan, Iñaki Muruak "mikrofonoa libre uzten det, nahi dunak ahal duna bota" kantatu ondoren, bertsolari mordoa animatu zen kantura: Imanol Lazkano, Jon Azpillaga, Xamalbide, Jon Lopategi, Xabier Amuriza, Joxe Agirre, Juan Mari Narbaiza, Joxe Lizaso, Txomin Garmendia eta Lazkao Txiki, besteak beste.

• 
•