Igandean 15:00etan ETB1en 2015-03-06

Bertsoaren erritmo ezberdinak Hitzetik Hortzeran

Bertsotarako erritmoa. Hainbat ikuspuntutatik begiratu dakioke erritmoari: bertsotan kantuan hasteko bertsolariak hartzen duen denbora, bertsoa bera kantatzeko erritmoa...  bertsolariek hitzaren mesedetan erabili ohi dituzte denbora eta erritmoa.

Horrelaxe kontatuko dute Zigoitian eta Gasteizen kantuan izan ziren bertsolariek. Zigoitian, Arabako Bertsolari Txapelketako bosgarren finalaurrekoa jokatu zen eta Manex Agirrek lortu zuen lehen postua. Berarekin aritu ziren kantuan Iñaki Viñaspre, Felipe Zelaieta, Asier Rubio, Peru Abarrategi eta Oier Arbina.

Gora Gasteiz herri-ekimenak antolatu zuen Gasteizko saioa, "hiri koloretsu baten alde". Han izan ziren kantuan Miren Amuriza, Irati Anda, Jone Uria, Amets Arzallus, Jon Maia eta Manex Agirre. Josu Goikoetxeak egin zituen gai-jartzaile lanak eta "gizarte-gaiak, integrazioa, arrazakeria… nahastu zituzten umore-tantekin"

2011an Arantzan Alaia Martin eta Miren Amuriza aritu ziren kantuan bertso-afarian. Gaur egun oraindik ez da ohikoa bi emakume elkarrekin kantuan aritzea mahaiaren bueltan eta Arantzako bertso-afariko irudiekin batera Miren Amurizaren gogoetak eskainiko ditu igandeko Hitzetik Hortzerak, gaur egungo bertsolaritzan emakumeak duen presentziaz eta eraginaz.

Hitzetik Hortzera, igandean 15:00etan ETB1en eta sarean EITB Nahieran atarian.

• 
•