Aste honetan hasi da lanean 2009-05-06

Josune Zabala Mintzolako zuzendari

Josune Zabala hautatu dute Mintzolako zuzendari, lehiaketa publiko bidez egin den hautaketan, eta aste honetan bertan hasi da lanean, Villabonako egoitzan. Mintzola ahozkotasunaren ikerkuntzarako zentrua da, fundazio batek kudeatzen du proiektua, Gipuzkoako Foru Aldundiak, Bertsozale Elkarteak, Euskal Herriko Unibertsitateak eta Villabonako Udalak osatua. Mintzolaren izaeraz eta egitekoei buruz, berriz, Joxerra Garziak landu du proiektua.

Josune Zabala (Errezil, 1978) formazioz eta lan eskarmentuz, bete-betean da ahozkotasunaren mundukoa. Euskal Filologian lizentziatua eta doktorego ikasketak burututakoa, Kortesia estrategia pragmatikoak eta Kortesiaren azterketa euskarazko bi debateetan ikertu ditu. Ikerlari izan da azken bi urteotan lanbidez, EHUko Psikolinguistika Laborategian, EJE (Euskararen Jabekuntza eta Erabilera) taldean. Eta 2004tik 2007ra, berriz, Mondragon Unibertsitateko irakasle aritu da, Humanitate eta Hezkuntza Zientzien fakultatean. Hemen ere hainbat ikerketa proiektutan parte hartu zuen, Ahozko hizkuntza derrigorrezko hezkuntzan, eta Esku-hartze psikopedagogikoa testuinguru kulturanitzetan, besteak beste.

• 
•