Xabier Amurizak idatzi du 2015-05-12

Bigarren ediziora iritsi da "Mañukorta Bertsonajea" liburua

 Bizkaiko Bertsozale Elkarteak Bizkaian bertsogintzan ari direnen biografiak jaso eta zabaltzeko zeregina hartua dauka. Hori dela eta, Gregorio Larrañaga "Mañukorta" bertsolariari buruzko biografia idazteko proposatu zioten Xabier Amurizari. Eta honek onartu egin zuen. 2014ko abenduan argitaratu zen "Mañukorta Bertsonajea" liburua, Mañukortari egindako elkarrizketak ardatz dituena. Eta gabonetarako ale guztiak agortu zirenez, bigarren edizioa atera dute.

 Sei ataletako liburua

 Liburua sei ataletan dago banatua, eta atal horietan Mañukortaren pentsamendua eta bertsolaritza ulertzeko modua islatzen dira. Bizkaian bertsolari maitatua izan da Gregorio Larrañaga "Mañukorta", eta plazan hainbestetan lagun izan duen Xabier Amurizak hartu zuen bere inguruko bilketa lana egiteko ardura.

 Aipu ugari bildu ditu Xabier Amurizak, tartean honako hauek: "Ni txarto bizi banitze, kulpie neurie litzakek"; "billurrik etxostek emoten ezek. Hiltziek apur bat, baina hori bajakixau"; "Subertia izan juat e! Holan ibiltteko aukerarik denak etxuek izen"; "kopletan zein bertsuetan, sokie eruten jakin bi´ok"; "nik etxuat kezkarik eukitten. Beti jaukat gogue bertsotan juteko".

 15 eurotan salgai

 Liburua 15 eurotan erosi daiteke Bizkaiko Bertsozale Elkartearen egoitzan edo www.lanku.com denda digitalean. Bertsozale Elkarteko bazkideek 12 eurotan eskuratu ahal izango dute.

 Gabonetan Bertsoak elkarrizketa egin zion Xabier Amurizari. Tartean, honako hau esan zuen: "Gaur egun ez dago Mañukortaren buruaren antzekorik".

• 
•