Xenpelar Dokumentazio Zentroa 2015-09-25

Bertsoa eta zientzia

2005ean Fisikako Kongresua egin zen Donostian eta zientzialari eta ikerlarien artean baziren Nobel Saridunak ere. Pedro Miguel Etxenike fisika doktorea aritu zen kongresuaren antolaketa-lanetan eta bera oso bertsozalea denez, ezin izan zuen aukera galdu bere kideei bertsolaritza zer zen erakusteko.

Saio berezia antolatu zuen: afalostean bideo batzuk jarri zituzten zientzialariei bertsolaritzaren ezaugarriak azaltzeko eta jarraian, Andoni Egaña aritu zen bertsotan eta Xabi Payak egin zituen itzultzaile-lanak. Bertsotarako gaiak fisikariek eurek jarri zituzten, eta horietako bat Zulo Beltzen teoriari buruzkoa izan zen.

Hemen dituzue entzungai Andoni Egañak abestutakoak.

Bihar bertso-saio berezia Bilbon
Bihar berriz elkartuko dira bertsoa eta zientzia Bilbon. "Jakinduriek mundue erreko dau: 3 bertsolari eta 5 zientzialari aurrez aurre" saio berezia izango da  Bizkaia aretoan arratsaldeko seietan.

Zientzia Kaiera atarian diotenez  "Kike Amonarrizek gidatuko duen saioan umorez, ironiaz, poesiaz eta jakinduria askoz zientzia gizarteratzen arituko dira: Miren Amuriza, Amets Arzallus eta Andoni Egaña bertsolariak, Gorka Azkune informatikaria, Naiara Barrado eta Itziar Garate astrofisikariak, Itziar Laka hizkuntzalaria eta Jon Mattin Matxain kimikaria"

Han izango gara gu eta laster ikusgai izango dituzue hango bertsoaldi onenak.

• 
•