Ximun Ibarra "Zubikoa" eta Juan Joxe Eizmendi" Errezil" bertsolariak omenduko dituzte 2015-10-09

Xalbador Eguna igandean Urepelen

Deiadarra elkarteak eta Euskaltzaindiak antolatu dute Xalbador Eguna. Larunbatean hasiko dira ospakizunak Urepelen. Iluntzeko 19:00etan Kalakan taldearen kontzertua izango da eta ondoren elkarrekin afaltzeko gonbita egin dute Xendarineko ahizpen kantuak entzunez.

Ezingo da asko luzatu larunbateko afalostea;  izan ere, igandean goizeko 9:00etan abiatuko da "Xalbador"-en etxolara joateko mendi-ibilaldia. Bazkalaurretik mahai-ingurua egingo dute Ximun Ibarra "Zubikoa" eta Juan Joxe Eizmendi "Errezil"  bertsolari omenduei buruz.

Dantza-emanaldi eta herri-kirol erakustaldiaren ondoren bazkaria egingo da eta segidan bertso-saioa.  Amets Arzallus, Sebastian Lizaso, Juan Joxe Eizmendi "Loidisaletxe" eta Jose Luis Gorrotxategi izango dira kantuan.

"Xalbador" Urepeli kantuan
Ikusgai duzuen bideoan "Xalbador"-ek bere jaioterria zen Urepeleri kantatutako bertsoa entzun dezakezue.  Izatez, hamabi bertsoko sorta da eta  ez-ohiko  doinua eta neurria ditu:  hamabiko txikia 7/6ko sei punturekin. "Nik zonbat pertsu alde" du izena doinuak eta hain juxtu, Urepeleri jarritako bertso-sortako lehen bertsoak eman zion izen hori.  Doinuaren jatorria honela azaltzen du "Xalbador"-ek berak: "Airea, Mixel Monaco zenak ezarri kantuena". 

"Odolaren mintzoa" izeneko liburuan argitaratu zituen bertso hauek. Liburua aurkeztu zen egunean omenaldia egin zioten "Xalbador"-i eta egun horretan bertan hil zen, 1976ko azaroaren 7an.


Xalbador Eguneko egitaraua
Urriaren 10a, larunbata:
· 19:00: Kalakan taldearen kantaldia, Urepeleko elizan.
. 21:00: Afaria. Xendarineko ahizpen kantuekin.
Urriaren 11, igandea:
. 09:00: Xalbadorren etxolara mendi ibilaldia, etxola eta Urepele ezagutzeko.
· 10:30: Meza nagusia, Xalbador eta Leoni, Zubikoa eta Errezil, Emile Larre eta beste hainbat lagun gogoratuz.
· 11:15: Zubikoa eta Errezil bertsolariei buruzko emanaldia eta mahai-ingurua.
. 11:30: Bizkaiko Salatzaile taldeko dantzariak, plazan.
. 13:00: Herri kirolak, Donazaharreko (Nafarroa Beherea) eta Mutrikuko (Gipuzkoa) taldeekin. Sokatira, sega, orga altxatzea eta lasto altxatzea.
. 14:00: Bazkaria, Xiberuko kantariek alaiturik.
· 15:30: Haurren txokoa.
· 15:30: Bertsolariak: Amets Arzallus, Sebastian Lizaso, Juan Jose Eizmendi Loidisaletxe eta Jose Luis Gorrotxategi. Gai-jartzailea: Joxe Mari Iriondo.
· 17:30: Erromeria, trikitilariekin.

• 
•