Ostiralean izango da Erniarraitz Sariketaren finala 2016-03-02

Eneritz Artetxe: "Bertsolari gazteak ezagutaraztea eta inguruan bertsozaletasuna sustatzea dira helburu nagusiak"

Zortzigarren edizioa du aurtengoa Erniarraitz Sariketak. 2002an egin zuten lehenengo aldiz Urola Bailaran eta orduz geroztik bi urtez  behin antolatu dute. Urte guzti hauetan Erniarraitz Bertsozale Elkartea aritu da antolaketa-lanetan. Bideoan ikusgai duzuen moduan, lehen aldi hartan Laxaro Azkunek kontatu zituen Hitzetik Hortzeran hastapeneko helburuak eta sariketaren nondik norakoak.

Bertsolari gazteei plaza ematea helburu nagusi
Hamalau urte pasa dira orduz geroztik eta Eneritz Artetxek, gaur egun Erniarraitz Bertsozale Elkarteko kide denak azaldu digunez, ez dira asko aldatu hasierako helburuak: "bertsolari gazteei plaza ematea da helburuetako bat eta urte hauetan guztietan bertsolari ugari pasa da Erniarraiztik". Bertsolarien hautaketan, "lehentasuna etxeko bertsolariei ematen zaie. Uneko kopuruaren arabera 18ko sariketa osatzeko lurraldetasunari garrantzi berezia ematen saiatzen gara, beti ere, sariketan mantendu nahi den bertso maila kontutan hartuz, herrialde ezberdinetako jendea egon dadin."

Bertsolari gazteei plazak ematearen helburua ez da aldatu baina bai parte-hartzaileen jatorria:  "Garai hartan bailarako bertsolariei begira antolatu zen baina urteekin beste dimentsioa bat hartzen joan da. Gaur egun Euskal Herri osoko bertsolariek hartzen dute parte bertakoekin batera".

Aurtengoan, "Gipuzkoako txapelketa ari zen bitartean erabaki ziren bertsolariak, eta txapelketan lan txukuna egin duten bertsolari askok hartu dute parte beste herrialdetako hainbat bertsolarirekin batera. Erniarraizko hiruk abestu dute eta Zestoako beste batek." azaldu digu Eneritz Artetxek.

Aldaketak aldaketa, aurtengoan ere helburuak beteta
Aldaketetekin hasi zen aurtengo Erniarraitz Sariketa: "aurreko edizioetan ostiral gauez egiten ziren kanporaketak eta aurten lehen aldiz igande arratsaldez egin dira, ostiraletan eskolarteko kanporaketak izaten baitira. Honekin bagenuen beldur piskat, ostiral gauetako giroak ez baitu zerikusirik igande arratsaldekoarekin. Baina hala ere, entzule, eta batez ere gazte asko izan dira hiru kanporaketetan, beraz, gustura geratu gara. Bertsolari gazteak ezagutaraztea eta inguruko bertsozaletasuna sustatzea ditugu helburu eta  bete direla" uste du Eneritz Artetxek.

Ostiraleko finala jai giroan
Ostiral gauean izango da finala Azpeitiko gaztetxean. Eneritz Artetxek esan digunez, "finala berezia izaten da eta kanporaketekin alderatuz desberdina. Hau ostiral gauez egingo da gaztetxean azken urteetan bezala eta adin guztietako jende piloa batzen da. Giroa bero egoten da eta ez dugu zalantzarik ondo aterako dela. Gainera finalean bailarako bi bertsolari daude eta hori beti da inguruko jendearentzat erakargarria. Dagoen seikotea ikusita ziurra da saio ona bezain bizia izango dela eta entzuleek ere maila berean erantzutea espero dugu".

Beraz hitzordua jarrita dago: ostiralean gaueko 22:00etan Azpeitiako gaztetxean Jon Gurrutxaga, Oihana Iguaran, Gemma Urteaga, Amaia Iturriotz, Unai Mendizabal eta Aitor Salegi izango dira kantuan Erniarraitz Sariketaren finalean.

• 
•