JAIOTZAREN MENDEURREAN 2009-05-16

Uztapideri omenaldia Zestoan

Manuel Olaizola Uztapideri omenaldia egin zioten larunbatean Zestoan, bere jaioterrian, mendeurreneko ekitaldien barruan. Lehenik, Udaletxean bere bertsolari eta idazle izaera goraldu zuten, eta ondoren omenaldia egin bere izena eramango duen plazan. Lehenengo ekitaldian Bertsolaritza, Euskaltzaindia eta erakunde publikoetako ordezkariek izan ziren hitza hartu zutenak. Iñaki Murua Bertsozale Elkarteko lehendakariak, Andres Urrutia Euskaltzainburuak, Maria Jesus Aranburu Gipuzkoako Aldundiko Kultura eta Euskara diputatuak eta Alazne Olaizola Zestoako Alkateak Uztapideren ekarpena txalotu dute, Batzar aretoa gainezka zela. Aurrean, Kontxi IturainUztapide zenaren emaztea eta semea.

Ondoren, Uztapide plaza izena hartu duen gunera joan ziren denak elkarrekin eta han Kontxi Iturainek, Uztapideren alargunak, kendu zion zapia Uztapideren oroitarriari, Agur Jaunak doinu artean. Jarraian, bertsoak etorri ziren: Xabier Amuriza, Sebastian Lizaso, Jon Lopategi eta Andoni Egana. Lau txapeldunak bertso bana bota zioten Uztapide zenari. Nikolas Zendoiak eta Olaldek ere bertso batzuk bota dituzte eta bukaeran, eskerrak emanaz, Manuel Olaizola Uztapide bigarrenak  kantatu du, Manulen semeak. Ekitaldian 150 lagun bildu dira.

Manuel Olaizola Uztapideren omenezko mendeurreneko ospakizunak Uztapide gogoan bertso elkarteak jarri zituen abian. Joan zen astean, Uztapideren bat-bateko antologia argitaratu zuten, CD eta guzti.

• 
•