Igandean 15:00etan ETB1en 2016-04-01

Denboraldiko azken Hitzetik Hortzeran mundura begira

Apirilean eta uztailean munduko hainbat kantu inprobisatzaile etorriko dira Euskal Herrira "Europa bat-batean" proiektuaren baitan. Izan ere, guk euskaraz egiten den bertsolaritza ezagutzen badugu ere, badira munduan beste hizkuntzetan inprobisatzen dutenak ere.

Udazkenean hasi ziren topaketa hauetarako motorrak berotzen. Izan ere, Leon eta Bartzelonan hainbat emanaldi egin zituzten bertsolariek Galiziako regeifeiroekin, Kataluniako glosadoreekin eta verseadore kanariarrekin. Euskal Herritik Maialen Lujanbio, Ane Labaka, Miren Amuriza eta Beñat Gaztelumendik hartu zuten parte, Galiziatik Pinto d`Herbon eta Xairo Vecino izan ziren, Kataluniatik Mireia Mena eta Ferriol Macip eta horiekin batera, Yeray Rodriguez eta Lydia Morenoz kanariarrak.

Leon eta Bartzelonako emanaldietako bertsoaldirik onenak eskainiko ditu aste honetako Hitzetik Hortzerak. Horrekin batera 2003ko Nazioarteko Kantu Inprobisatuak ekarriko dituzte gogora, Bilboko Euskaldunan egin zen amaierako ekitaldiko irudi "hunkigarriekin".

Hori guztia Hitzetik Hortzeran, igandean 15:00etan ETB1en eta noiznahi EITB-ren Nahieran atarian.

Denboraldi honetako azken Hitzetik Hortzera
Igandean emitituko da denboraldi honetako azken Hitzetik Hortzera eta irailean itzuliko da atal berriekin. Bitartean eta urte osoan bezala, www.bertsoa.eus-en ikusi ahal izango dituzue udaberri eta udako saioetako bertsoaldi onenak eta bertsolaritzaren bueltan sortzen den informazioa ere bertan izango duzue.

• 
•