Taket Bertso Eskolak eta Mungialdeko musikariek 2017-01-11

'Bertso guztien habia' diskoa argitaratu dute Mungian

Esaera zaharrari buelta eman eta Bertso guztien habia izeneko diskoa argitaratu dute Mungian Taket bertso eskolak eta herriko musikariek elkarlanean. Besteak beste, herriko trikitilariak, rockeroak, musika eskolako musikariak, Taberna Ibiltaria, Itziarren semeak, Belako, Rafa Rueda, Nohizean Behin, Kherau... Diskoak bederatzi kanta eta esker bertso bat biltzen ditu.

Herriko bertsolarien eta musikarien arteko lotura estutzea, elkarlana indartzea eta lekuko sormen-potentziala ikusaraztea izan dira proiektuaren oinarriak. Bestalde, herriko letragileen eta musikarien aberastasuna islatzea ere izan da beste xedeetako bat.  
Egileen hitzetan, diskoa Made in Mungia da, bertatik bertara egindako lanaren emaitza: diseinua, grabaketa, edizioa… denak egin baitira Mungialdean.

Askotariko musika-estiloak, idazkerak, kantakerak eta gaiak uztartzen dira diskoan, ardatz baten inguruan, baina (Mungiarekin eta bertsolaritzarekin lotutakoak dira denak): herriko auzoak, bertso-gaitza harrapatzea, bertso-eskolako gazteen eragiletza, parranda eta ligoteoa, bertsoa eta zurruta uztartu beharra edo behar ez izatea, bertso-eskolatik urruntzea, emakume bertsolariaren ahotsa eta Taket bertsolari zaharraren ibilbidea.

Diskoa salgai dago Mungiako Liburutegian, 5 euroan.

• 
•