Xenpelar Dokumentazio Zentroan 2017-02-03

Jon Azpillagaren agurra Bertso Egunean

 Atzo hil zen Jon Azpillaga bertsolari ezagun eta maitatua. Plaza asko eta asko egin zituen bere bertso ibilbide oparoan. Bertsozaleen gogoetan bereziki iltzatuta geratu da 60ko hamarkadatik aurrera, Frankismoaren zentsurari eta mehatxuei aurre eginda, besteak beste Jon Lopategirekin batera plazetan egindako bidea.

 Txapelketetako ibilbidea

 Txapelketetan ere nabarmendu zen Pasaian jaio eta urte eta erdira Berriatuan bizitzen jarritako bertsolaria: 1961ean Bizkaiko Bertsolari Txapelketa irabazi zuen, eta Txapelketa Nagusiko finaletan aritu zen 1960an, 1962an, 1980an eta 1982an.

 2012ko Bertso Egunean

 2012ko urtarrilaren 28an Bertso Eguna izan zen Donostian. Bertsolaritzaren belaunaldiartekotasuna gaitzat hartu zen domino piezak ikur izan zituen edizio hartan. Horren lekuko, agurrak: Jon Azpillagak hiru bertso bota zituen hasierako agur moduan eta Maddi Sarasuak bota zuen azkeneko agurra. Jon Azpillagaren hiru bertsoak ekarri ditugu hona omenaldi moduan.

 Hileta gaur

 1960an Mutrikura ezkondu zen Jon Azpillaga, eta han bizi izan da. 81 urterekin hil da. Gaur izango da hileta elizkizuna, 19:00etan, Mutrikun bertan.

• 
•