Apirilaren 21-22an 2017-04-19

Mintzolak Ondare kulturalaren inguruko jardunaldietan hartuko du parte, Asturiasen

Mintzola Ahozko Lantegiak Ondare Kulturalaren inguruko jardunaldietan hartuko du parte, Asturiasen. Apirilaren 21ean eta 22an gauzatuko dira jardunaldiok: lehen egunean Madrilen, eta bigarrenean Villanueva de Santo Adriano herrian, Asturiasen. Kultur ondarearen kudeaketa komunitarioaren inguruko saioak izango dira eta hainbat esperientzia bilduko dituzte; tartean, bertsolaritza mugimenduaren talaiatik helduko diote gaiari Mintzola Ahozko Lantegiko ordezkariek.

Karlos Aizpurua eta Aritz Zerain arduratuko dira Mintzola Ahozko Lantegiaren izenean, hitzaldia eta tailerra eskaintzeaz. Bertsolaritza: una tradición moderna hitzaldia eskainiko du Aizpuruak larunbat goizean eta arratsaldean Zerainekin eta Xosé Antón "Ambás" Asturiasko ahozko kulturaren adituarekin batera ¿Qué es una bertso-eskola? tailerra eskainiko dute hirurek. Hitzaldian bertsolaritzaren mugimendua nola antolatua dagoen azalduko da eta tailerrean bertso-eskoletan zer lantzen den ikusaraziko da; inprobisazio teknikaren inguruan ariko dira parte-hartzaileak.

Jardunaldiak La Ponte-Ecomuséu, Medialab Prado, Heritage and Social Innovation Observatory-University College London eta Fundación Valdés-Salasek antolatu dituzte.

• 
•