Udako Ikastaroak 2017-08-23

Bertsolarien kantaera eta sormena aztergai Miramar Jauregian

Ostegunean eta ostiralean izango dira ikastaroak. Lehenengo egunean Ainhoa Aizpurua, Itziar Navarro eta Maialen Lujanbio izango dira hizlariak eta Eñaut Agirre, Oihana Iguaran eta Jon Martin bigarrenean.

 Azken urteotan bertsolaritzak bere lekua izan du EHUko Udako Ikastaroetan. Aurtengoan bertsolarien kantaera eta sormena izango dira aztergai Miramar Jauregian. Ostegunean eta ostiralean izango dira saioak.

 Bertsolarien kantaera

 Lehenengo egunean kantaera izango dute aztergai. Hasteko, Ainhoa Aizpurua bertsolaritzaren prosodiaz ariko da, eta hitzaren eta musikaren arteko harremana ulertzeko gakoak emango ditu.

 Ondoren, Itziar Navarrok bertsolarien kantaerak denboran zehar izan duen bilakaera azalduko du, Oiartzungo kasua adibidetzat hartuta.

 Atsedenalditik bueltan Maialen Lujanbioren txanda izango da, eta bertsolari baten begietatik doinuak eta kantaerak duten esanahiaz ariko da.

 Bukatzeko, mahai-ingurua egingo dute hirurek.

 Bertsolarien sormena

 Ikastaroko bigarren egunean bertsolarien sormena izango da ardatz. Hasteko Eñaut Agirre jardungo da hizlari lanetan, eta ahozko hizkeraren ezaugarriek bertsolarien bat-bateko jardunean duten presentzia azalduko du.

 Ondoren, Oihana Iguaranek bertsogintzaren eta hedabideen arteko harremanaren inguruko azalpena emango du.

 Atsedenaldiaren ostean Jon Martin sormenaz eta jarioaz ariko da eta hiru hizlarien mahai-inguruak borobilduko du saioa.

 Ikerketak oinarri

 Ostegun eta ostiraleko hitzaldi gehienak hizlariak egiten ari diren ikerketetan oinarrituta egongo dira. Horietako zenbait bertsolaritzaren inguruko doktore-tesiak egiten ari dira EHUko Euskara eta Ikerkuntza Errektoreordetzei, Mikel Laboa Katedrari eta Mintzola Ahozko Lantegiari esker.

 Izena emateko aukera zabalik

 Ikastaroa hasi arte matrikulatzeko aukera zabalik egongo da hemen.

Albiste gehiago

Jone Larrinaga Dañobeitia - Bertsolari Bertsozale Podkasta 2024-03-28

«Bertsolaritzaren garapena aberatsagoa da espektatibarik gabe»

Mikel Artola Izagirre - Gipuzkoako Bertsozale Elkarteko koordinatzailea 2024-03-26

«Gipuzkoan 10-50 urte bitarteko bertsolari ia denek kantatuko dute udaberrian»

Juanjo Uria Zubiarrain - Bertsolari bertsozale podkasta 2024-03-15

Juanjo Uria: bertsoa eragiletzatik eta pasiotik bizi duen hernaniarra

Araitz Katarain, Izaro Bilbao eta Janire Arrizabalaga - elkarrizketa 2024-03-13

«Bertso munduratze prozesu horretan sortzen diren gatazkak gorpuztuko ditugu, mimoz, arduraz eta umorez»

Larunbat gauean 21:00etan ETB1en 2024-03-07

Hitzetik Hortzera Xabier Rico Arabako txapel emailearekin