Edurne Azkarate izango da Hitzetik Hortzerako gonbidatua

2018an ohiko formatuan itzuliko da Hitzetik Hortzera. Igandero plazaz plaza bildutako bertso onenak eta gonbidatuak ekarriko ditu. Diziplina ezberdinetan dabiltzan hainbat lagunek bertsolaritza nola bizi duten ezagutzera emango du saioak: kirolariak, idazleak, aurkezleak, aktoreak… gonbidatuko dituzte programara.

Urtarrilaren 7ko atalean Edurne Azkarate izango da gonbidatua. Astelehenetako Aulki-Jokoa telebista-saioaren aurpegia izan da Edurne Azkarate eta bera hobeto ezagutzeko aukera izango da. Bertsoei dagokionez, abenduaren amaieran Elgoibarren, Aretxabaletan eta Hernanin egin diren jaialdietako bertso onenak ekarriko ditu saioak.

Elgoibarren Miren Artetxe, Amets Arzallus, Andoni Egaña, Igor Elortza eta Maialen Lujanbio izango dira kantuan eta Uxue Alberdik egingo ditu gai-jartzaile lanak; Aretxabaletan Uxue Alberdi, Amets Arzallus, Oihana Iguaran eta Agin Laburu ariko dira bertsotan eta Amaia Agirrek jarriko dizkie gaiak; eta Hernanin, Unai Agirre, Amets Arzallus, Sustrai Colina, Agin Laburu, Maialen Lujanbio eta Eli Pagola izango dira kantuan Jose Luis Urdangarinen aginduetara.

Hitzetik Hortzera, igandero 15:00etan, ETB1en.