Liburu eta CD batean 2018-02-23

2017ko Bertsolari Txapelketa Nagusia lan batean bilduta

 Abenduaren 17an bukatu zen 2017ko Bertsolari Txapelketa Nagusia, Barakaldoko BEC aretoan jokatu zen finalarekin. Aurretik jokatutako beste 13 saioetan txapelketan parte hartu zuten 43 bertsolarien ehunka bertsorekin gozatu ahal izan zuten bertsozaleek. Eta horien bilduma jasotzen duen argitalpena argitaratu du Euskal Herriko Bertsozale Elkarteak.

 700 bertsotik gora

 Argitalpen bikoitza da honako hau, liburua eta CDa baitakartza. Liburuak Bertsolari Txapelketa Nagusiko bertsoaldi onenen bilduma du oinarr. Denera 700 bertso baino gehiago daude irakurgai, txapelketako 14 saioetatik jasota. Horrez gain, saioetako kronikak ere jaso ditu 492 orrialdeko liburuak.

 Adituen analisiak

 Eta saioetan jasotakoari begirada sakonagoz begiratu dioten adituen analisiak osatu du liburua. Lan horretan jardun dira, besteak beste, Uxue Alberdi bertsolari eta idazlea, Xabier Sukia bertsolari eta irrati-esataria, Ane Labaka bertsolari eta ikerlaria, Ainhoa Agirreazaldegi eta Manex Agirre bertsolariak; Eider Rodriguez, Harkaitz Cano eta Arantxa Urretabizkaia idazleak eta Josu Goikoetxea gai-jartzailea. Eta txapelketako doinuen azterketa eta doinu berrien partiturak ere badakartza liburuak.

 200 bertsotik gora entzungai

 Baina irakurtzeko soilik ez, bertsoak entzuteko aukera ere eskaintzen du argitalpenak, 200 bertsotik gora biltzen dituen CDa ere argitaratu baita liburuarekin batera.

 Lanku Kultur Zerbitzuan eta Bertsozale Elkartean eskuragarri

 Argitalpena eskuragarri dago Lanku Kultur Zerbitzuen atarian eta Bertsozale Elkarteak Amasa-Villabonan duen egoitzan. Bazkideek 25 eurotan eskuratu ahal izango dute lana, eta bazkide ez direnek 30 eurotan.