"Bertsolaritza Genero Ikuspegitik" jardunaldiak 2018-07-02

Karine Etxeberri: "Espazio anitz zituzten emazteek sortzeko"

 Karine Etxeberrik hitzaldi mamitsua eskaini zuen Iruñean, Udako Euskal Unibertsitateak antolatutako "Bertsolaritza Genero Ikuspegitik" jardunaldietan. Duela hiru urte osatutako ikerketa bat ardatz hartuta, bertsolaritzaren feminizazioaz aritu zen.

 Bilakaera historikoa

 Azterketa hura Baxenafarroan, Lapurdin eta Nafarroan kokatua zegoen eta bereziki ibilbideak izan zituen aztergai. Iruñeko hitzaldian, hala ere, bilakaera historikoa hartu zuen mintzagai eta bertsolaritzan emakumeek izan duten presentziaz aritu zen. Eta bertsolaritzaren mugimenduan, plazetan, bertso-eskoletan eta funtzio ezberdinetan egiten den bereizketa sexuala ere aztertu zuen.

 Bi adibide historiko

 Emakumeek bertsolaritzan izan duten presentzia ez baita beti berdina izan. Karine Etxeberrik XIX mendeko bi bertsolari hartu zituen adibidetzat: Mariana Etxegarai eta Mariane Hargain. Lore-Jokoetan ere bertsotan aritzera iritsi ziren.

 Bi kasu hauetatik abiatuta, emakumeak bertsotan aritzen ziren gune bat baino gehiago zeudela azaldu zuen: dendarien etxeak, konbentuak eta lantegiak esate baterako.