"Bertsolaritza Genero Ikuspegitik" Jardunaldiak 2018-07-03

Uxue Alberdi: "Egiturari erreparatzen eta neurri zehatzak hartzen hasi behar dugu"

10 emakume bertsolariri galdera bikoitz bat egin die Uxue Alberdik: "emakume bertsolari bezala, zuri buruz egiten diren kanpo irakurketek eragin al dizute? Eta eragin badizute, nola eragin dizute bertsoa sortzerako orduan?" Jasotako erantzunak oinarri hartuta egin zuen hitzaldia Iruñean, eta gizartearen egiturak orokorrean eta bertsolaritzaren egitural partikularki duen pisua nabarmendu zuen.

 Askoren barruak mugitu zituen Uxue Alberdik "Bertsolaritza Genero Ikuspegitik" jardunaldietan, Iruñean. Emakume bertsolarien testigantzak abiapuntutzat hartuta osatu zuen bere jarduna.

 10 testigantza oinarrian

 10 emakume bertsolariri galdera bikoitz bat egin zien Uxue Alberdik: "emakume bertsolari bezala, zuri buruz egiten diren kanpo irakurketek eragin al dizute? Eta eragin badizute, nola eragin dizute bertsoa sortzerako orduan". Galdera hauen helburua honako hau zela azaldu digu Uxue Alberdik: gizartearen egiturak orokorrean, eta bertsolaritzaren egiturak partikularki, ea emakume sortzailea mugatzen ote duen bere jarduna egin ahal izateko, eta mugatzen badu, nola mugatzen duen.

 Mugatze mota ugari

 Jasotako testigantzak oinarri hartuta, mugatze mota bat baino gehiago antzeman zituen Uxue Alberdik. Mugatze mota horiek sailkatuta osatu zuen hitzaldia. Sailkapen irekia erabili zuen, testigantza askotan mugatze mota bat baino gehiago antzeman baitaitezke.

 Agentzia eta egitura

 Azken aldian bertsogintzan ari diren emakumeek askotan entzun behar izan duten baieztapen batek sortutako kezkatik abiatu zen Uxue Alberdi ikerketa honetan: ez kexatzeko, ez biktimizatzeko eta egitura ez kritikatzeko, egiteko baizik. Agentzia hartzeko, alegia. Baina baieztapen hauek erakusten dutena da egiturak pisu ikaragarria daukala emakume bertsolarien sorkuntzan, mugatze mota asko jasan behar izaten dituztela eguneroko sormen lana egin ahal izateko. Eta beraz, egitea garrantzitsua bada ere, inguruan kide asko ikusten ditu egin eta egin eta egin, ikuspegi ezberdin askotatik eta diziplina askotan. Baina egiturari ere erreparatu egin behar zaiola azpimarratu zuen hitzaldian Uxue Alberdik: neurri zehatzak hartu behar direla bertsolaritza askeago eta berdinzaleago bat nahi baldin bada behintzat.

Albiste gehiago

XXVII. BBK sariketa 2019-04-04

Durangaldea nagusi BBk sariketan