Udazkenean jokatuko da 2018-07-12

11 talde eta 43 bertsolari izango ditu Taldekako Xilabak

11 talde eta 43 bertsolari izango ditu Taldekako Xilabak
Urriaren 12an hasiko da eta abenduaren 1ean amaitu, Xiberoa, Baxenabarre eta Lapurdin inoiz jokatu den xapelgorik jendetsuena.
Xiberoa, Baxenabarre eta Lapurdiko Xilaba Xapelgoa taldeka jokatu da aurten eta parte hartze zabala izango du. Guztira 43 bertsulari eta 15 bat gai-emaile eta antolatzailek hartuko dute parte hiru herrialdeotan inoiz jokatu den xapelgorik jendetsuenean. 
 
11 talde
Eskukula (Amikuze). Tirrit (Baigorri, Itsasu). Otsoaren 7 umeak (Donibane Garazi). Dilindan (Makea, Hazparne). Sasi Bertsolariak (Hendaia, Ziburu). Ostatu Batuak (Hendaia, Urruña). Ezkorbrutak (Hiriburu). Kantiniersak (Maule, Xiberoa). Mattinsalto (Azkaine, Sara). Kontrabanda (Azkaine, Sara). Kosta ala Kosta (Hendaia).
 
Urriaren 12an hasi, abenduaren 1ean finala
Taldekako Xilaba urriaren 12an hasiko da eta abenduaren 1ean jokatuko da finala. Dagoeneko zozketak eginda daude eta finkatuak gelditu dira lehen faseko multzoak.
Taldekako Xilabaren lehen multzoa
Formatu aldaketa bertsolarien oinarria zabaltzeko
Orain dela bi urte jokatu zen azkeneko aldiz Xiberoa, Lapurdi eta Baxenabarreko Bertsulari Xapelketa. Ordukoan 15 bertsolari aritu ziren lehian eta, behin finala jokatuta, gogoetari ekin zioten antolatzaileek. Bertsolarien oinarria zabaltzeko asmoz erabaki dute formatua aldatzea. Hiru herrialdeotan lehen ere egin izan da taldekako dinamika, 'Xanpiona' hain zuzen ere, aski modu informalean bada ere.


Gazteen plazaratzea helburu
Azken urteotan gazte ugarik landu dute bertsolaritza bertso-eskoletan. Gazte horietako asko ez dira banakako txapelketetarako jauzia ematera ausartzen, baina, taldearen babesean, aurtengoan oholtzara erakarri nahi izan dira.

Bi urte barru banakakoa
Orain dela bi urteko Xapelketak egin zuen 2017ko Bertsolari Txapelketa Nagusirako Xiberoa, Lapurdi eta Baxenabarreko bertsolari ordezkariak hautatzeko galbahe-lana. Hemendik bi urteko Xapelketak lan hori ere izango duenez, berriz ere banakako formatura itzuliko da Xiberoa, Lapurdi eta Baxenabarreko Bertsulari Xapelketa 2020an.

Taldekako formatua denean hedatuta
Taldekako Xilabarekin taldekako lagunarteko txapelketa formatoak erabateko hedapena hartu du egungo bertsolaritzan, buruz buruko txapelketaren osagarri gisa, bere egiteko eta funtzio propioarekin.

80. hamarkadan hasi zen formatu hau indarra hartzen. Urteko askotako etenaren ondotik, 1999an Gipuzkoako Herriartekoa etorri zen, finalean 2.000 lagun bildu zituena.

Pasa den hamarkadan hasita, Arabako Kuadrilla artekoa eta Nafarroako Bardoak sendotu dira, oso parte hartze zabalarekin eta buruz buruko txapelketaren osagarri gisa planteatuta. 2017an, Gipuzkoa eta Bizkaia sartu ziren dinamika horretan eta 2018an Taldekako Xilabak borobilduko du dinamika hori.

 

Publizitatea

Albiste gehiago

Larunbatean 21:00etan ETB1n 2024-11-14

Hitzetik Hortzerak bertsolarien kantakera aztertuko du Ainhoa Aizpurua ikerlariarekin

Larunbatean 21:00etan ETB1n 2024-11-07

Martin Goikoetxea bertsolari 'amerikarra' eta Nafarroako Bardoak Hitzetik Hortzeran

larunbatean 21:00etan ETB1en 2024-10-31

Hitzetik Hortzera Mikele Arizkorretarekin

Datorren astelehenean hasiko da Bilbon 2024-10-31

Helduak bikoteka aurten BBK Sarian eta finala Durangoko Azokaren girora hurbildu dute

Eneko Lazkoz Martinez - Bertsolari Bertsozale Podkasta 2024-10-25

«Txapelketak bertsoarekin lotura mantentzeko modu bat eman dit eta harreman oso onak»

‘Bertso Bira’ Gipuzkoako Foru Aldundia eta Lankuren eskutik 2024-10-24

30 bertso saio Gipuzkoako zahar-egoitzetan, adinekoen gozagarri