bertsolaritza ikasgeletan 2019-05-14

Ia 200 bertso emanaldi egingo dira hezkuntza arautuko sarean

Bertsolaritzaren ikasturtea behar bezala biribiltzeko, ikasturte bukaerako bertso emanaldiak eskainiko dituzte ikasleek. 196 egingo dira guztira, ikasleek gurasoei, ikaskideei edota herriko bizilagunei ikasitakoa, eta gozatutakoa, erakusteko.

Euskararen 7 lurraldeetan, 205 herritan, 469 ikastetxetan eta 26.366 ikaslerekin landu da hitzaren jolasa, Bertsozale Elkarteko 53 irakasleren eskutik. 34 urte bete ditu bertsolaritza ikastetxeetan txertatu duen Bertsozale Elkartearen egitasmoak. Aurtengo ikasturtean, gainera, www.bertsoikasgela.eus atari berriaz gozatu ahal izan dute ikasleek, irakasleek zein ikastetxeek. Webgune horretan bertsolaritza lantzeko baliabideak esku-eskura jarri dira, egitasmoa garatzen den eskoletan.

Lurralde guztiak martxan

Araban topaketak egingo dituzte Gorbeialdean, Lautadan, Amurrion nahiz Laudion. Bizkaian ere 18 topaketa egingo dira herri edota eskualde mailan, eskualdeko bi bertsolariren parte hartze eta guzti. Bestalde, Mikel Inunziaga musikariaren laguntzarekin 50 kantaldi eskainiko dira.

Herri mailako 82 jaialdi egingo dira Gipuzkoan, eta bertsolaritza lantzen duten 13 eskola txikietan, ikasturte bukaerako eskola jaialdiaren baitan egingo zaio tartea bertso emankizunari. Nafarroan ere ikastetxe eta herri mailako 22 jaialdi egingo dituzte, eta, zenbaitetan, eskualdeko bertsolariek eta bertso eskolek ere hartuko dute parte.

Lapurdi, Baxenabarre eta Zuberoari dagokionez, Seaskako ikastolekin lau Bertsulari Ttiki egun ospatuko dira; ikastola bakoitzak bere emanaldia eskainiko du, Oskar Estanga musikariak eta bi bertsolarik lagunduta.