argitalpenak 2019-06-28

'Female Improvisational Poets' argitalpena kaleratu da

2018an Elkon (AEB) egin zen Cowboy Poetry Gathering delako jaialdiaren baitan, The Role of Women in Basque and American Oral Poetry jardunaldiak antolatu zituen Renon kokatuta dagoen Nevadako Unibertsitateko Euskal Ikasketen Zentroak (Center for Basque Studies). Mintzola Ahozko Lantegiak antolaketa lanetan lagundu zuen eta beste erakunde zenbaiten babesa lortu ez ezik, Euskal Kultur Erakundea kasu, Mintzolak bideratuta hartu zuten parte jardunaldietan Jone Miren Hernandez, Maialen Lujanbio, Miren Artetxe eta Oihana Iguaran ikertzaile eta bertsolariek.

Jardunaldietan AEBn jatorria duen country erako poesia eta bertsolaritza izan zituzten hizpide, beti ere emakumearen presentzia aintzat hartuta. Bertso saioak nahiz hitzaldi akademikoak antolatu zituzten, eta arrakasta handia izan zuen kongresuak, eta horren erakusle da 900 pertsona joan izana ekitaldi nagusira. Jardunaldiok mintzagai, Female Improvisational Poets. Challenges and Achievements in the Twentieth Century liburua atera du aipatu Euskal Ikasketen Zentroak, eta aste honetan aurkeztu dute Xabier Irujo Euskal Ikasketen Zentroko zuzendariak, Iñaki Arrieta hango Euskal Liburutegiko zuzendariak eta jardunaldietan eta, honenbestez, liburuan parte hartutako Maialen Lujanbio bertsolariak.

Bi motatako artikuluak biltzen ditu liburuak: batetik, bertsolaritzak izandako ibilbidearen analisi antropologikoa egin dute artikulu banatan Jone Miren Hernandez, Joseba Zulaika eta Larraitz Ariznabarreta ikerlariek. Maialen Lujanbio, Oihana Iguaran eta Miren Artetxe bertsolariek, berriz, bertsolaritzaren barrutik, beren bizipenetan oinarrituta, egin dute analisia. Halaber, cowboy poesiaren azterketa egin dute Caroline Dufurrenak eta Amy Halek. 

Bertso eskolen inguruko argitalpena

Datorren urtean beste argitalpen bat ateratzeko asmoa du Euskal IkasketenZentroak. Bertso eskolen ingurukoa izango da, eta Mintzolak lagundu du artikulu horien egileak bideratzen: Harkaitz Zubiri, Miren Artetxe, Oihana Iguaran eta Xabier Amuriza izango dira, besteak beste, parte hartuko dutenak.