bertsokabi 2019-10-10

Zabaldin jokatuko da 2019ko Bertsokabi Sariketaren bigarren kanporaketa

Zabaldin jokatuko da 2019ko Bertsokabi Sariketaren bigarren kanporaketa
Saioa urriaren 10ean izango da, 19:00etan. Ekain Alegre eta Iker Gorosterrazuk, Mikel Lasarte eta Sarai Roblesek eta Ekhiñe Zapiain eta Josu Sanjurjok osatutako bikoteek hartuko dute parte bigarren saio horretan.

Pasa den ostegunean eman zitzaion hasiera 2019ko BERTSOKABI-Eugenio Arraiza Sariketari, Terminal tabernan jokatutako saioarekin. Aitor Irastortza eta Xabat Illarregi nagusitu ziren lehen saio horretan, eta hortaz, urriaren 24ko finalerako sailkatu ziren. Bihar, urriak 10, jokatuko da bigarren kanporaketa, Zabaldi Elkartasunaren Etxean (Nabarreria kalean), 19:00etatik aurrera. Oholtza gainean izango dira Ekain Alegre eta Iker Gorosterrazu, Mikel Lasarte eta Sarai Robles eta Ekhiñe Zapiain eta Josu Sanjurjo. Bikote irabazlea zuzenean sailkatuko da finalerako. Asier Garciak egingo ditu gai-jartzaile lanak, eta, publikoarekin batera, Joseba Beltza eta Amaia Telletxea ariko dira epaile. Hirugarren kanporaketa, finaleko azken bikotea zehatuko duena, heldu den ostegunean izango da, urriak 17, Mendillorriko Antzara gunean.

Osotara, 16 eta 30 urte arteko hemezortzi bertsolari ariko dira sariketan, bikoteka. Nafarroako bertsolari gazteei trebatzeko eta jendaurrean kantatzeko aukera emateaz gain, Iruñerriko publikoa –bereziki gazteak- bertsozaletzeko xedea du sariketak, bertsoa hiriburuko eremu informaletara eramanez. Era berean, egitasmo horren bitartez, Eugenio Arraiza (Iruñea, 1936-2015) zenaren figurari gorazarre egin nahi dio Nafarroako Bertsozale Elkarteak. Ikertzaile eta eragile nekaezina, kulturgintzaren eta euskalgintzaren alor ugaritan aritu zen Arraiza; besteak beste, Nafarroako Bertsozale Elkartearen fundatzaile eta lehendakariordea izan zen urteetan.

Sariketak, bertsolari gazteentzako akuilu
2017an abiatu zuen Nafarroako Bertsozale Elkarteak BERTSOKABI-Eugenio Arraiza Sariketa, Iruñeko Udalaren eta Euskokultur Fundazioaren laguntzarekin. Orduko arrakastak hauspotuta dator sariketaren bigarren aldia, beste behin ere, Iruñeko lau gune informal bisitatuko dituena.

Egun, Nafarroako Bertsolari Txapelketa eta Bardoak taldekako bertso ekimenarekin batera, bertsolari gazte eta hasiberrientzako sariketak dira Nafarroako Bertsozale Elkartearen sustapen arloko egitasmo nagusiak. Txandaka, bi sariketa nagusi izaten dira: Izeta Sariketa (Mariano Izetaren omenez, Elizondon), eta BERTSOKABI-Eugenio Arraiza Sariketa, orain bi urte hasitakoa.

Sariketak akuilu dira herrialdeko bertsolari gazteentzat, haien bertsogintzan sakontzeko eta publiko aurrean trebatzeko aukera ematen dieten neurrian. Gerora Nafarroan plazarik plaza ibilitako bertsolari askok eman zituzten lehen urratsak gazteentzako bertso sariketetan.

Albiste gehiago

Jone Larrinaga Dañobeitia - Bertsolari Bertsozale Podkasta 2024-03-28

«Bertsolaritzaren garapena aberatsagoa da espektatibarik gabe»

Mikel Artola Izagirre - Gipuzkoako Bertsozale Elkarteko koordinatzailea 2024-03-26

«Gipuzkoan 10-50 urte bitarteko bertsolari ia denek kantatuko dute udaberrian»

Juanjo Uria Zubiarrain - Bertsolari bertsozale podkasta 2024-03-15

Juanjo Uria: bertsoa eragiletzatik eta pasiotik bizi duen hernaniarra

Araitz Katarain, Izaro Bilbao eta Janire Arrizabalaga - elkarrizketa 2024-03-13

«Bertso munduratze prozesu horretan sortzen diren gatazkak gorpuztuko ditugu, mimoz, arduraz eta umorez»

Larunbat gauean 21:00etan ETB1en 2024-03-07

Hitzetik Hortzera Xabier Rico Arabako txapel emailearekin