Kopla Barik 2020-10-20

'Kopla Barik' udazkeneko bertso zirkuitoa antolatu dute Bizkaian

Bizkaiko Bertsolari Txapelketa urte betez atzeratu ostean, bertsoaz gozatzeko aukera emango duen bertso zirkuitu txiki bat antolatu dute Bizkaian. "Aitzakiarik gabe, kopla barik. Kulturaz gozatzeko momentu guztiak direlako onak."

Gaur goizean aurkeztu da dinamika berria eta guztira 4 saio izango dira, formatu ezberdinetakak: Bertso saio musikatua, bertso trama, sariketa eta jaialdia. 

Lehen saioa datorren larunbatean bertan izango da, urriaren 24ean, Mungiako Olalde Aretoan, 19.00etatik aurrera. Saio musikatua izango da eta kantuan Aitor Bizkarra, Arrate Illaro, Ibon Ajuriagojeaskoa, Etxahun Lekue, Malen Amenabar eta Nerea Ibarzabal arituko dira. Gai jartzaile lanetan Idoia Anzorandia ibiliko da eta, musikariak, Ixak Arruti eta Eneko Sierra izango dira. 

Bigarren saioa, bertso trama

Azaroaren 14ean jokatuko da Igorreko Lasarte Aretoan, aurreko saioaren ordu berdinean. Bertan arituko dira bertsotan Eneko Abasolo 'Abarkas', Jone Uria, Julen Arzanegi, Miren Amuriza, Txaber Altube eta Unai Mendiburu. Tramagileak Lilibertso bertso-eskolako kideak izango dira. 

Sariketa Durangoko Plateruena antzokian

Azaroaren 28an jokatuko da , hau ere, 19.00etatik aurrera. Kantuan Ander Elortegi, Imanol Uria, Irune Basagoiti, Oihana Bartra, Onintza Enbeita eta Xabat Galletebeitia ariko dira. Gaiak ALBE Algortako Bertsolari Eskolaren esku. 

Bizkaiko txapeldunak, saio berean

Zirkuituaren amaierak Bizkaiko zortzi txapeldun batuko ditu oholtza gainean. Abenduaren 20an izango da hori, Getxoko Muxikebarri Antzokian, arratsaldeko 18.00Etan. Arkaitz Estiballes, Etxahun Lekue, Fredi Paia, Igor Elortza, Jon Enbeita, Onintza Enbeita, Unai Iturriaga eta Xabi Paya ariko dira kantuan. Gai-jartzaile lanetan, Bizkaiko Txapelketako gai-jartzaile taldea ibiliko da.

Saio guztietarako sarrerak www.bertsosarrerak.eus atarian eskuratu ahal izango dira.