Ombuaren itzala 2020-10-22

"Ombuaren itzala", auzolanetik zinemara

"Ombuaren itzala", izen hori izango du Pello Mari Otaño (Zizurkil, 1857 - Rosario, Argentina, 1910) bertsolariari buruz EGUZKI ART ZINEMA ekoiztetxeak burutu nahi duen filmak. Patxi Bisquert aktore zizurkildarra da proiektuaren sustatzaile nagusia eta diru bilketa kanpaina bat abiatu dute erronka horri aurre egiteko. "30.000 sarrera baietz!", 30 mila zine sarrera aurrez saltzea jarri dute helburu gisa, 10 eurotan sarrerako.

Lana ez da dokumentala izango, fikziozko luzemetraia baizik eta aktore kopuru zabala espero den arren, Bisquert bera jarriko da bertsolariaren azalean. Proiektuaren helburua Otañok merezi duen ikusgarritasuna ematea dela adierazi zuen Bisquert-ek, ahanzturatik aldendu eta era berean, haren egitza eta bizitza gaurko belaunaldiei eskeintzea. Otañok maite izango zukeen herri-ekimenaren izaera frogatzeaz gain, filma egin ahal izateko denon laguntza ezin egokiagoa izango da, Euskal Herritik hasi eta Argentinaraino, Otañoren itzalak berriz elkartuko dituen bi lurraldeak.

Urriaren 8an egin zuten aurkezpen ekitaldia Zizurkilgo Plaza Etxeberrin eta Patxi Bisquert-en aldamenean, bertan izan ziren proiektuari babesa azaltzen Xabier Amuriza, Joseba Tapia musikaria, Hernandorena kultur elkarteko kide Joxin Azkue eta Zizurkilgo udaleko Maite Amenabar alkateordea.