Santa eskea 2021-02-04

"Santa Ageda bezpera dugu..."

"Santa Ageda bezpera dugu..."
Argazkia | 2020, Getxo | Iturria: ALBE
Euskal Herrian urte luzeetako ohitura da Santa eskean ateratzekoa. Otsailaren 4ean makilak hartu, ahotsak berotu eta atez ate ibili ohi dira makina bat talde kantuan. Aurten, egoerak hala behartuta, beste modu bat asmatu behar izan da ohitura horri eusten ahalegintzeko.

Bi bertso eskolaren adibideak aipatuko ditugu jarraian. Egiteko bide ezberdinak baina helburu nagusia bakarra: ohiturari eusten saiatzea.

Harituz Tolosaldeko Bertsozale Taldeak, adibidez, Tolosaldeko Santa Eskea 2021 egitasmoa jarri du martxan aurten. Eskualdeko jendeari kopla kantuan agertzen diren bideoak eskatu eta bideo zatiak batzean datza egitasmoa.

"Eskualdean egun seinalatua da otsailaren 4a. Herri askotan ateratzen da jendea eskean eta eskualdeko koplari eta bertsolari guztiek abesten dute batean ez bada, bestean. Horrez gain, Harituzek duela bi urte Santa Eskeko ohitura galduta dagoen herrietan berreskuratzeari ekin zion eta lehen bi urteetan Berastegin horretan ahalegindu ostean, 2021ean Baliarraingo Santa Eskea berreskuratzeko helburua zuen taldeak" aipatu digute taldekideek. 

Aurtengo ezintasunekin ohitura galtzeko arriskua ikusirik ekin zioten ideia berri honi: "egunak berezi izaten jarrai dezan, Harituzen zuzendaritza batzordean dagoen kide batek Santa Eskeari modu honetan eusteko proposamena egin zuen eta ideia ona iruditu zaie elkartekjo kideei. Konfinamenduan Hauspotuz Tolosaldeko Trikitixa Elkarteak ere antzeko ekimen bat jarri zuen martxan eta 200 trikitilariren bideoak jaso zituzten. Formatuaren ideia haiei lapurtutakoa da".

Guztira hogei herri baino gehiagotako jendeak hartu du parte, hogeita hamar koplaritik gora. Harituz Tolosaldeko Bertsozale Taldeak eskerrak eman nahi dizkie parte hartzaile guztiei eta helburuak betetzat ematen dituztela aitortu digute: "Batetik, Santa Eskeko ohituran azpimarra jartzea eta bertsolaritzarentzat hain seinalatua den eguna itzalpean pasatzen ez uztea. Bestetik, datozen urteetan Santa Eskeko ohiturari eusten jarraitu ahal izateko zubi-lana egitea, aurten ere jendea kantuz jarriz eta azkenik, eskualde mailako egitasmoa burutu eta bertsozale zein koplasiak haritzea".

Jarraian ikusgai dagoen bideoa da jendearen koplekin osatutako bideoetako bat. Gainontzekoak ere ikusgai Harituz taldearen Youtubeko kanalean.

Tolosaldetik Getxora

ALBE Algortako Bertsolari Eskolari eskolako kideak ere urtero atera ohi dira Santa Eskean Getxoko baserri eta etxeetan barrena. Albekideekin batera, euskaltegiko lagunak ere ibili ohi dira kantuan eta talde handi bat elkartu ohi da goizetik eta ilundu arteko ibilbidean. Aurten, tamalez, askoz ekimen xumeagoa egitea beste aukerarik ez dute izan: "Urtero talde handi samarra elkartu ohi gara, gurekin batera euskaltegiko lagunak ere etorri ohi dira etxez etxe. Aurten ez da posible izan" azaldu digu albekide batek.

"Aurten laukote bat soilik arituko gara kopletan, neurri guztiak errespetatuz: musukoa soinean, distantzia mantenduta eta, noski, etxekoen onespena izanda. Izan ere, aurreko egunetan etxeetatik pasatzeko ohitura dugu ea bertakoak prest dauden edo zer aldarterekin dauden jakiteko; eta aurten bereziki garrantzitsua izan da hori". Ohikoa baino ibilbide laburragoa egingo dute, bazkaririk ez da izango eta iluntzean berandurarte luzatzeko aukerarik ere ez, noski, azken finean "ohiturari eusteko kontu sinbolikoa" izango da gehienbat.

Albiste gehiago

Jone Larrinaga Dañobeitia - Bertsolari Bertsozale Podkasta 2024-03-28

«Bertsolaritzaren garapena aberatsagoa da espektatibarik gabe»

Mikel Artola Izagirre - Gipuzkoako Bertsozale Elkarteko koordinatzailea 2024-03-26

«Gipuzkoan 10-50 urte bitarteko bertsolari ia denek kantatuko dute udaberrian»

Juanjo Uria Zubiarrain - Bertsolari bertsozale podkasta 2024-03-15

Juanjo Uria: bertsoa eragiletzatik eta pasiotik bizi duen hernaniarra

Araitz Katarain, Izaro Bilbao eta Janire Arrizabalaga - elkarrizketa 2024-03-13

«Bertso munduratze prozesu horretan sortzen diren gatazkak gorpuztuko ditugu, mimoz, arduraz eta umorez»

Larunbat gauean 21:00etan ETB1en 2024-03-07

Hitzetik Hortzera Xabier Rico Arabako txapel emailearekin