Astebururako planak 2021-02-12
Zer plan astebururako?
Aurreneko saioa gaur bertan, arratsaldeko 18.00etatik aurrera izango da Altzon, baina aste hasieran abisatu bezala, gonbidapenak agortuta daude dagoeneko. Plaza biziberritzen egitasmoaren baitan antolatzen den "Eskolatik Plazara" ekimenaren hirugarren eta azken saioa izango da. Imanol Artola "Felix" izango da gai-jartzailea eta kantuan arituko dira Haira Aizpurua, Irantzu Idoate, Aner Peritz, Nerea Ibarzabal eta Maialen Lujanbio.
2021eko lehenengo bertso eguna izango da bihar, larunbatez, Iruñean. Gayarre antzokira bertaratzeko 150 sarrera berri jarri dituzte gaur goizean. Internet bidez zuzenean jarraitzeko aukera egongo da ere eta horretarako www.bertsosarrerak.eus atarian eskuratu ditzakezue sarrerak (3 eta 5 eurotan). Saioan Julio Soto, Miren Amuriza, Onintza Enbeita eta Xabier Silveira bertsolariak eta Ainhoa Larretxea gai-jartzailea elkartuko dira eta Eneko Lazkoz eta Oihane Perea bertsolariek ere hartuko dute parte emanaldian.
Bihar, hala ere, beste bi emanaldi berezi izango dira Euskal Herriko beste bi herritan. Aurrena, Goizuetan, Kontzertu bat bertsotan emanaldia eskainiko dutte Eli eta Manex Pagolak. 18.30etatik aurrera izango da hori. Usurbilen izango da bigarrena eta Sutegin, 18.00etatik aurrera, Erradikalak ginen emanaldia ikusteko aukera izango da Ane Labaka eta Beatriz Egizabalen eskutik.
Igandean Legorretako Herri Antzokian Koplariak Koplari hitzaldi musikatua eskainiko dute Xabier Amuriza eta Agus Barandiaranek. 19.00etatik aurrera izango da.
