Abra jaialdia 2021-02-25

ABRA sariketa jaialdi bihurtu da aurten

Azken 5 urtetako txapledunak elkartuko dira Algortako Kasinoan larunbat honetan, otsailaren 27an. Aitor Servier, Maider Arregi, Aroa Arrizubieta, Xabat Illarregi eta Ekhiñe Zapiain izango dira beraz kantuan eta gai jartzaile, berriz, Jone Uria arituko da. Saioa 18.00tan hasiko da eta beharrezkoa da aurretik izena ematea 605704385 zenbakira edo albegetxo@gmail.com helbidera idatzita.

Ohiko formatuan 6 bertsolari gazte aritzen dira lehian eta saioa afariaren ostean izaten da. Aurten ordea, denek honez gero ondo ezagutzen ditugun arrazoiengatik egoerara moldatu beharra izan dute ALBE Algortako Bertso Eskolako antolatzaileek: "Pandemiaren kontuarekin saio guztiak birpentsatzen ari garenez, honi ere buelta pare bat eman genizkion. Azkenean antolatzen dugun gazteen saio bakarra beti da sariketa formatuan, lehian, eta  txapeldunak etxera oroigarria eta txapela daramatzan arren, pentsatu genuen plazara saltoa eman nahi duen gazte batentzat ez ote zen sari hobea saio bat eskaintzea. Hortik etorri zen jaialdia azken urteetako txapeldunekin egitearen ideia eta ikusiko da ea gerora begira ere martxa hau mantenduko dugun".

"Oso kartel polita gelditu dela uste dut. Niri ilusioa egiten dit egia esan gaiak jartzeak eta entzuteko gogoz nago, eta sentsazioa dut beraiek ere gogotsu etorriko direla. Jaialdi batera normalean lasaigo joaten da bat, beste aldarte batekin, eta oso aukera polita dela iruditzen zait, bai eurek kantatzeko eta bai guk entzun eta gozatzeko" gaineratu du Jone Uria bertsolari eta saioko gai-jartzaileak.