Zaleen parte-hartzearekin 2021-04-16

...Gerturatu Eta Lau: entzuteko, hausnartzeko, esperimentatzeko

Tangramaren paradoxak dio pieza berdinekin egitura berdinak eraikita ere, emaitza ezberdina izaten dela. Tangrameko piezak dantzan jarriko ditu Bertsozale Elkartearen ekimen berri honek, zalea ere parte hartzera gonbidatuta: "Praktikaren teoriatik edo, nahi bada, teoriaren praktikatik, saiakera bat egingo dugu, porrota ere arrakastatzat jota".

Esperimentua izango da denontzat Gerturatu Eta Lau ekimena: denontzat, bertsolarietaz harago zaleen parte-hartzeak ere izango duelako zer esanik saioa biribiltzerakoan. 

"Nolakoa litzateke bertsolaritzaren egitura bera feministagoa, kooperatiboagoa eta horizontalagoa balitz? Bertsolaritza elementu askok osatzen dute, eta batzuetan joera izaten dugu elementu horiek era isolatuan aztertzeko. Bertsolaria eta gai-jartzailea. Bertsolaria eta entzulea. Kantatzen dena eta kantatzen duen gorputza. Testua eta kantaera. Muga zurrunak ezarri ordez horiek lausotu eta bertsolaritza beste leku batetik biziko bagenu, ez ote genuke sorkuntzarako leku eta bide berririk aurkituko?" 

Lau saio izango dira eta saio bakoitza gai batean oinarrituko da: bertsolarien erabakimena, entzuleen erabakimena, kantaera eta gorputzen arteko harremana. Maiatzaren 6an, 11n, 18an eta 25ean izango dira saioak Donostian, Bilbon, Gasteizen eta Zarautzen; 18:30ean hasiko dira guztiak.

Izen-ematea doakoa da, baina aurretik gorde behar da lekua www.bertsozale.eus atarian dagoen izen-emate orria beteta.

Plaza indartzeko martxan jarritako Plaza Biziberritzen egitasmoaren baitan kokatu du elkarteak Gerturatu Eta Lau.

Saio guztien xehetasunak, hemen.