Udaberritik udazkenera 2021-05-10

Udazkenean egingo da Eskolartekoaren finala

Emeki-emeki apirilean hasitako bideak martxa bizia hartu du azken egunotan. Bertsozale Elkarteak iragarri berri duenez, udaberrian eta udan egingo dira 2021eko Eskolarteko Bat-bateko Bertsolari Txapelketako saiorik gehienak, baina udazkenean emango zaio amaiera Euskal Herriko finalarekin.

Apirilaren 23an hasi zen Eskolartekoa Gipuzkoako lehen kanporaketa saioarekin, eta pixkanaka bat egin dute Arabako eta Bizkaiko gazteek ere; laster izango dira Nafarroako saioa eta Lapurdi, Baxenabarre eta Zuberoa elkartzen dituena.

Lurraldeetako finalak finkatuta daude egutegian: maiatzaren 15ean egingo da Agurainen Arabakoa, Bertsoa Bizi Gazte Eguna ospatzearekin batera; maiatzaren 28an izango da Gipuzkoako Eskolartekoaren finala Urnietan; eta hurrengo egunean, Bizkaikoa Igorren eta Nafarroakoa Lesakan. Azken hauek Bertso Eskolen Eguna ospatzeko ere baliatuko dute hitzordua. Azkenik, Lapurdi, Baxenabarre eta Zuberoako gazte bertsolariak elkartzen dituen txapelketari dagokionez, kanporaketa saioak eginda, ekainaren 26an egingo da finala Senperen.

Lurralde bakoitzean sailkatzen diren txapeldunordeekin eta txapeldunekin egingo da uda ondoren 2021eko Eskolartekoari amaiera emango dion Euskal Herriko Eskolartekoaren finala.

Ikastolen Elkarteak eta Bertsozale Elkarteak antolatzen dute Eskolarteko Bat-bateko Bertsolari Txapelketa; Euskal Herrikoak 32 beteko ditu aurten. Gazteei jendaurrean bat-batean jarduteko aukera ematea du helburu, eta baita haurrak eta gazteak entzulearen aulkitik zaletzea ere.