Feminismoa 2021-09-16

Ahalduntze Bertso Eskola Feminista eta Gizonentzako Bertso Eskola Feminista, abiatzear

Gaur goizean ireki berri du Bertsozale Elkarteak Ahalduntze Bertso Eskola Feministan eta Gizonentzako Bertso Eskola Feministan izena emateko epea; irailaren 26ra arte eman ahal izango da izena batean zein bestean. Behin epe hori amaituta, irailaren 30ean jakinaraziko da taldeen osaketa, eta urrian ekingo diote 2021-2022 ikasturteari bi eskolek: urriaren 9an hasiko da Gizonentzako Bertso Eskola Feminista eta urriaren 16an Ahalduntze Bertso Eskola Feminista.

Plazako bat-bateko jardunari begira emakume bertsolariak trebatzen dituen Ahalduntze Bertso Eskola Feministaren zazpigarren ikasturtea izango da datorren hau; hirugarrena, Gizonentzako Bertso Eskola Feministaren kasuan. Bertsolaritzan, gizonezko gisa, generoaren gaiak duen eraginaz gogoeta egiteko eta norbere kokapenaz hausnartzeko sortu zen azken hau. Bertsolariak eta gai-jartzaileak ez ezik, bertso munduan ari den eta gaian interesa duen edonor ere animatu nahi da Gizonentzako Bertso Eskola Feministara.

Hilean behin izaten dira saioak bi eskoletan: larunbatez, 10:00etatik 14:00etara. Bertsozale Elkarteak iragarri duenez, aurten, Ahalduntze Bertso Eskola Feministaren kasuan, eta beti ere izen-ematearen arabera, bi talde osatzeko aukera egongo balitz, talde bat Durangon elkartzea aztertuko da.

Ikasturteko egutegia, izen-ematea eta gainerako xehetasunak, www.bertsozale.eus atariko ondorengo loturetan:

• Ahalduntze Bertso Eskola Feminista
• Gizonentzako Bertso Eskola Feminista