"Gabiriako bertsolaritza eta bertsolaritza Gabirian" proiektua aurkeztuko da urriaren 1ean

Gabiriaren eta bertsolaritzaren arteko harremana aztertzeko asmotan dira Eresti Oiarbide, Maialen Akizu eta haiekin batera lanean ariko diren beste zenbait herritar. Proiektuaren nondik norakoak azalduko dituzte urriko lehen egunean, Ordizian; zehazki, 17:30ean izango da hitzordua, Barrena Jauregian.

Ondutako Gabiriako bertsolaritza eta bertsolaritza Gabirian proiektu proposamenak Kilometroak Kultur Elkarteak eta Mintzola Ahozko Lantegiak deitutako beka deialdia eskuratu du aurten, bi erakundeok elkarlanean esleitzen duten bigarrena. 3.000 euroko saria eskuratuko dute orain proiektua dena ikerketa bihurtzeko. Goierriko Andramendi, Jakintza eta San Benito ikastolen eta Gerriko Kultur Elkartearen babesa ere izan du deialdiak.

"Gabirian bertsoarekiko afizioak izan duen lekua belaunaldiz belaunaldi transmititu da, beste oso leku gutxitan bezala" azaldu dute Akizuk eta Oiarbidek proiektuan. Horregatik, "Gabirian bertsoak izan duen eta duen leku kurioso bezain adierazkorra" aztertu nahi dute; bai Gabiriako bertako bertsolaritza, eta baita Gabirian bertsolaritzak eta bertsolaritzaren barruan Gabiriak izan duen pisua ere. Bidenabar, herritarren arteko harremantzea indartzeko eta euren parte-hartze aktiboa sustatzeko baliatu nahi da Gabiriako bertsogintzaren eta bertsozaletasunaren azterketarako lan hau; izan ere, belaunaldi ezberdinetako gabiriarrek hartuko dute parte.

Bestalde, ikerketa garatzeko, bertsolaritza eta Gabiria lotzen dituen anekdota, bertso, argazki eta antzerakoak jaso nahi dituzte. Horretarako, posta elektroniko bat ere jarri dute eskuragai: gabiribertso@gmail.com helbidea.

17:30eko aurkezpenaren ondoren, 19:00etan, kultur emanaldia izango da Ordiziako herri antzokian Kilometroen eskutik eta tartean izango da bertso saioa: Igor Egurenen gaiei erantzuten ariko dira Andoni Egaña, Ane Zuazubiskar, German Urteaga eta Onintza Enbeita. Sarrerak www.kilometroak.eus atarian izango dira eskuragai bihar eguerditik aurrera.

Bertso saio gehiago

Urriaren 1ekoa ez da Kilometroek antolatu duten bertso saio bakarra. Pasa den astean Lazkaon egin zen beste saio bat, eta ostiral honetan, hilaren 24an, izango da beste jaialdi bat ere Beasaingo Usurbe antzokian: Saroi Jauregi gai-jartzaileak gidatuta, Aitor Sarriegi, Iker Zubeldia, Maialen Lujanbio eta Nerea Ibarzabal ariko dira bertsotan. Sarrerak www.kilometroak.eus atarian daude eskuragai.