"Aiztondoren zirtotsa" sarera iritsi da

Kilometroak Kultur Elkarteak eta Mintzola Ahozko Lantegiak elkarlanean ateratako ikerketa beka eskuratu zuen Aiztondoren zirtotsa: Aiztondoko zirto tradizioa eta aplikazio didaktikoa proiektuak, Amasa-Villabona eta Zizurkilgo Zubimusu ikastolak eta Zizurkilgo Hernandorena Kultur Elkarteak babestuta. Harituz Tolosaldeko Bertsozaleen Elkarguneko zenbait kidek aurkeztu zuten proposamena, eta, urtebeteko epea pasata, lana amaitu eta sarean dago erabilgarri: bertsolaritzari lotutako material didaktikoa dagoen www.bertsoeskola.eus eta www.bertsoikasgela.eus atarietan, zehazki.

Beñat Iguaran, Haritz Mujika, Imanol Artola, Mikel Artola, Oihana Iguaran eta Unai Mendizabal dira lanaren egileak. Aiztondo bailarako (Gipuzkoa) zirto historikoak bildu, berriak sortu eta haiekin ikus-entzunezkoak egin dituzte antzezlan labur moduan, gero ikasgelan baliatzeko.

Pasadizo umoretsuetan agertu ohi den bat-bateko erantzun laburra da zirtoa, erriman oinarritu ohi dena, eta ikasketa prozesua oinarrizko unitate horretatik hasteak gerora bertsoa osatzeko gaitasunean lagundu dezakeela azaldu zuen Mikel Artolak pasa den uztailean Aiztondoren zirtotsa lana aurkezteko agerraldian. Bertsoa osatzeko gaitasunak trebatzeko bakarrik ez eta sormena, jendaurrekotasuna eta lankidetza eta dialektika lantzeko baliabide interesgarria da zirtoa egileen iritziz, eta, helburu horiek betetzeko osatu dute ikasmateriala.

Orain lan hori eskura dago Bertsozale Elkarteak garatutako www.bertsoikasgela.eus eta www.bertsoeskola.eus atarietan. Hementxe topatuko dituzue:

• Bertsoikasgelan: https://bertsoikasgela.eus/albisteak/zirtoak-lantzeko-proposamen-didaktikoa/