Ikerketa 2021-10-05

“Guretzat ere polita da ikustea hau nondik datorren"

“Guretzat ere polita da ikustea hau nondik datorren"
Gabiriako bertsozaletasuna izango dute aztergai bertako zenbait herritarrek. Kilometroak eta Mintzolak deitutako bigarren ikerketa beka eskuratu du "Gabiriako bertsolaritza eta bertsolaritza Gabirian" proiektuak.

"Gabiriarrak abilak gara, errautsetik sua pizten; eta beka hau aprobetxatuz, aukera hau zaigu irten", hasi zen kantuan Aratz Igartzabal Gabiriako bertsolaritza eta bertsolaritza Gabirian proiektuaren aurkezpenean, pasa den ostiralean, Ordiziako Barrena Jauregian. Ikerketa proiektuak Kilometroak Kultur Elkarteak eta Mintzola Ahozko Lantegiak deitutako bigarren ikerketa beka eskuratu du, eta horri esker, 3.000 euroko saria lortu dute proiektua dena ikerlan bihurtzeko. Horretarako, urtebeteko epea izango dute egileek.

Betidanik izan dute gabiriarrek herriko bertsozaletasuna aztertzeko eta dokumentatzeko gogoa, eta ikerketa bekak aitzakia ederra eman die lanean hasteko: "Txapelketa Nagusia denean edo inguruko herriren batean saioa dagoenean, taldean mugitu izan gara; eta zer esanik ez, dauzkagun bertsolari pila. Berezia da", azaldu du Eresti Oiarbidek, ikerketa garatuko duen taldeko kideetako batek. Berak eta Maialen Akizuk sinatu zuten proiektu sariduna, baina taldean egingo dute ikerlana. Endika Igartzabal da partaideetako bat: "Txikitatik jaso dugu bertsoa zerbait ohiko bezala. Guretzat ere polita da ikustea nondik datorren hau, zergatik gauden egoera honetan, zenbat kasualitate gertatu diren edo zenbat lan egin den hona iristeko". Kideek erosoen sentitzen diren horretan egin ahal izango dute ekarpena, eta hala banatu dituzte egitekoak: elkarrizketak egiten eta dokumentazioa jasotzen ari dira orain. Gabiriarekin eta bertsolaritzarekin lotutako anekdota, ikus-entzunezko, irudi edo antzerakorik izanez gero, gabiribertso@gmail helbidera bidaltzea eskertuko dute.

Taldearen izenean aurkezpenean hitza hartu zuten Aratz Igartzabalek eta Eresti Oiarbidek; baita deialdia antolatu duten Kilometroak Kultur Elkarteko eta Mintzola Ahozko Lantegiko ordezkariek ez ezik, lagundu duten Gerriko Kultur Elkarteko eta Goierriko ikastoletako ordezkariek ere.

Lanean jarraituko dute gabiriarrek herria berezi egiten duen horri eusteko; Aratz Igartzabalek aurkezpenean botatako bertsoan aipatu bezala "Gabiriako bertso katea sekula eten ez dadin".

Informazio gehiago, hemen.

Albiste gehiago

Jone Larrinaga Dañobeitia - Bertsolari Bertsozale Podkasta 2024-03-28

«Bertsolaritzaren garapena aberatsagoa da espektatibarik gabe»

Mikel Artola Izagirre - Gipuzkoako Bertsozale Elkarteko koordinatzailea 2024-03-26

«Gipuzkoan 10-50 urte bitarteko bertsolari ia denek kantatuko dute udaberrian»

Juanjo Uria Zubiarrain - Bertsolari bertsozale podkasta 2024-03-15

Juanjo Uria: bertsoa eragiletzatik eta pasiotik bizi duen hernaniarra

Araitz Katarain, Izaro Bilbao eta Janire Arrizabalaga - elkarrizketa 2024-03-13

«Bertso munduratze prozesu horretan sortzen diren gatazkak gorpuztuko ditugu, mimoz, arduraz eta umorez»

Larunbat gauean 21:00etan ETB1en 2024-03-07

Hitzetik Hortzera Xabier Rico Arabako txapel emailearekin