Hirugarrenez 2021-10-19

Ahostegunetan izena emateko epea amaituko da igandean

Urriaren 28tik azaroaren 18ra arte gauzatuko da aurten Ahostegunak. Hirugarren urtez jarraian, antzerkian, bertsolaritzan, kantagintzan edota literaturan trebatzen ari diren Euskal Herriko gazteak lau ostegunetan elkartuko dira, diziplina horiekin esperimentatzeko eta elkarren artean iritziak eta esperientziak partekatzeko.

Saioak Donostian izango dira, 16:00etatik 19:00etara, Euskaltzaindiak egoitza duen Tolare baserrian, UPV/EHUko Gipuzkoako campusaren aldamenean. 18 eta 22 urte bitarteko gazteei zuzendutako ekimena da, eta interesdunek igandea baino lehen eman beharko dute izena.

Kultur diziplina horietan iaioak diren sortzaile ezagunek ere hartuko dute parte, tartean bertsolaritzari lotutakoak: Ane Labaka bertsolaria eta Maite Berriozabal gai-jartzailea izango dira azaroaren 4ko saioan. Intza Alkain aktorea, Joseba Larratxe komikilaria eta Miren Narbaiza musikaria ere ariko dira aurtengo Ahostegunetan.

Hirugarren edizio hau Bertsozale Elkarteak, Euskaltzaindiak, Mintzola Ahozko Lantegiak eta UPV/EHUko Mikel Laboa Katedrak antolatu dute.

Interesa izanez gero, eman izena hemen.

Ikerketa deialdietara aurkezteko epea amaitzear dago

Ikerketa proiektu sari bat eta bi GRAL sari dituzte eskaintzeko Mintzolak eta Mikel Laboa Katedrak. Proiektuak eta ikerlanak aurkezteko uztailaren 20an hasitako hiru hilabeteko epea bihar amaituko da. Behin epea amaituta, lanak aztertu eta azaroaren 24an egingo da sari banaketa.