2021eko Nafarroako Bertsolari Txapelketa 2021-11-19

Estitxu Arozenak jantziko du txapela

17:00etan hasiko da finala eta bertan kantatuko duten zortzi bertsolariak prest daude: Eneko Fernandez Maritxalar, Eneko Lazkoz Martinez, Joanes Illarregi Marzol, Josu Sanjurjo Altzuri, Julio Soto Ezkurdia, Saioa Alkaiza Guallar, Xabat Illarregi Marzol eta Xabier Silveira Etxeberria. Hurrrengo astean finalisten hitzak entzuteko aukera izango dugu sareko plazan.

Saioko ariketa puntuagarriak bukatu ondoren helduko da txapela janzteko unea eta ikur sinbologiko hori Estitxu Arozena Albizuk jarriko dio aurten txapeldunari. Modu horretan, urte luzez Nafarroako bertsolaritzaren alde egindako lan guztia eskertu nahi dio Nafarroako Bertsozale Elkarteak, bai eta iaz, 1995ean irabazitako txapelaren 25.urteurrenean –emakume batek irabazitako lehena-, egitekoa zen eta pandemiak galarazi zuen omenaldia egin.

Gainera, aste honetako Hitzetik Hortzera programan Estitxurekin elkartuko da Eider Perez aurkezlea eta elkarrekin aurtengo txapelketaz, iraganeko garaiez eta egungo Nafarroako bertsolaritzaren egoeraz solastuko dira, besteak beste. Horrez gain, txapelketako finalerdietako hautaketa ere eskainiko da.

Finaleko sarrerak eskuragai daude www.bertsosarrerak.eus atarian eta informazio gehiago txapelketaren orrian bertan.