Azpeitian eta Usurbilen 2022-05-05

Sardiniako bertsoak gurean maiatzaren 19an eta 20an

Sardiniako bertsoak gurean maiatzaren 19an eta 20an
'Improvisa Una Antiga Poesia' ikuskizuna eskainiko dute. Dioniggio Bitti, Guiseppe Porcu, Tenore Murales de Orgòsolo, Alaia Martin eta Julio Soto ariko dira besteak beste. Remundo Piras inprobisatzaile eta poeta sardiniarraren obran oinarritutako lana da.

Maiatzaren 18 eta 19an Sardiniako inprobisazioaren perla berri bat gozatzeko aukera izango da Euskal Herrian, Bidaiak egitasmoaren baitan. 'Improvisa Una Antiga Poesia' ikuskizuna eskainiko dute. Remundu Piras Sardiniako poesia lehiaketetako cantadore handienaren inguruan osatutako eta Paolo Pillonca kazetariak idatzitako omenaldi barregarria aurkeztuko dute.

Sardinieraz eta euskaraz, bat-bateko bertsoak, Pirasen eta euskal bertsolarien bertso idatziak, kontakizuna, musika eta irudiak uztartuko dira ordu eta erdiko emanaldian. Dioniggio Bitti, Guiseppe Porcu, Tenore Murales de Orgòsolo, Alaia Martin eta Julio Soto ariko dira besteak beste.

Sardiniarrak lehenago ere izan dira Euskal Herrian, 2016an. Kasu honetan ordea, beste eskualde bateko inprobisazio moldea da, desberdina.

Tra Parola e Musica - Casa di Suoni e Racconti erakundeak ekoitzitako ikuskizuna da. Korsikan, Maltan, Grezian, Suitzan edota Katalunian ere prestatuko dira egokitzapenak, kantu inprobisatuen arteko loturak baliatuta. Italia Txiki elkarteak bideratuta eta Bertsozale Elkartearen eskutik iritsiko da gurera.

Usurbilgo Sutegi aretoan izango da lehen emanaldia maiatzaren 19an, 19:00etatik aurrera, eta Azpeitiko Sanagustin Kulturgunean bigarrena, 22:00etan, maiatzaren 20an.


Remundo Piras inprobisatzailea, eskuinean.

Bidaiak saio esperimentalak
Bidaiak Bertsozale Elkarteak bere ekimenez eta elkarlanean antolatutako saio esperimentalak dira. Ohiko bertso plazatik harago, bestelako emanaldi eta saiakera berritzaileei aukera ematea du helburu, bertso plazaren formatuen ertzak zorrozteko eta zabaltzeko. Horri Bertsozale Elkarteak atzerriko kantu inprobisatuekin duen elkarlan esperientzia gehituta atera zaigu hurrengo bertso bidaia proposamena.

www.bertsosarrerak.eus atarian
Emanaldia maiatzaren 19an eta 20an eskainiko da Usurbilen eta Azpeitian, hurrenez hurren. Sarrerek 5 euro balio dute Bertsozale Elkarteko bazkideentzat eta 7 gainerako zaleentzat; www.bertsosarrerak.eus atarian eskura daitezke.

Gipuzkoako Foru Aldundiaren Oreka dirulaguntza jaso du Bidaiak egitasmoak.

 

Albiste gehiago

Eli Pagola irabazle 'Hike Eizan' bertso paper sariketan 2022-07-01

'Tximista eta trumoia' ipuin bat bertsotan, noka

Urteroko jaialdia 2022-06-30

Barañaingo bertsoak sareko plazan

Bertsolari Bertsozale podcasta 2022-06-24

Irantzu Idoate Funosas, Bertsolari Bertsozale

Gontzal Agote - Bertsozale Elkarteko Lehendakaritza taldeko kidea 2022-06-23

«Txapelketak halako gogo eta ilusio berezia pizten du»