Maialen Lujanbio - rr#5 2022-05-24

«Erradiografia horretan dena mugitzen da eta era berean izugarrizko mugimendua ez dauka ia ezerk»

'rr 5# marrak. Hitz eta bertso emanaldian garaiaren erradiografia mugitu bat' emanaldia eskaintzen ari da Maialen Lujanbio eta ostegunean Larrabetzuko Hori Bai gaztetxean izango da ikusteko aukera, 19:00etan.

2018an Feministaldiak eskatuta sortu zuen lan honen oinarria, garai hartan lantzen ari zen elementu desberdinei forma emanez. «Bertsolariok beste egiteko modu edo testura batzuk ere lantzen ditugu eta kasu hartan irratian ere ari nintzen, arte sonoroarekin Ornitorriskus eta beste esperientzia batzuk probatu nituen... eta rr emanaldia izan zen ahozkotasun genero desberdin horiek guztiak nahasten zituen emanaldi bat».

2018ko abiera hartatik, Lujanbiok lau saio egin zituen, lau saio elkarrengandik desberdinak. Denbora batez «pausan» egon ondoren, Azpeitian etorri zen ostera plazara ekartzea, Hitzaren Eskolaren eskutik. Bostgarren emanaldia zenez, hortik datorkio izenburuko zenbakia. «Marrak, azpititulua edo ardatza erantsi diot, aldaera hau, bosgarrena den atal hau, marraren ideia eta gurutzaketen, perspektiben eta alde bat eta bestearen eta abarren gainean eraikia dagoelako».

Azpeitiako emanaldia ondo atera zen eta hortik etorri zen bost-sei emanaldiko bira egitearen aukera, eta halaxe da orain. Gipuzkoa, Bizkaia, Araba eta Nafarroan emanaldi bana egingo du, Iparraldeko oraindik ezin izan du lotu agenda kontuak medio, baina aukerak zabalik jarraitzen du.

Hurrengo hitzorduak
Ostegunean, Larrabetzun; 29an Zarautzen; eta ekainaren 9an Gasteizen, Oihanederren. Gerta liteke beste emanaldi solteren bat egitea, baina, ez du aurreikusten zabalkunde handiago bat ere.