Elkar ezagutzeko helburuz 2022-09-08

Bertsolari edo bertso munduko juntadizoa Zerainen

Bertso Egunaz gain, aspaldikoak dira bertsolari eta bertso munduko jendea elkartzeko egun bereziak, garaian garaiko talde eta inguru ezberdinek bultzatuta. Joan den mende bukaeran eta honen hasieran Antzuolan izan zen urte luzez, futbol partida baten bueltan. Beste zenbait herrietara ere zabaldu zen gero. Azken 10-15 urteetan Zumaian ia urtero egin izan da Arraun Eguna ere deitu izan zaiona: eguerdian arraunean egin, bazkaria, bertsoak eta gero gerokoak.



Asteartean Zerainen (Gipuzkoan) 90 lagun inguru bildu ziren egun pasa, Oiharte Sagardotegian, urteroko elkartze horri jarraipena eman eta elkarrekin lasai egoteko asmoz. «Elkarrekin egoteko aukera gehiegirik ez dugu izaten» azaldu dio aurten antolakuntza lanetan aritu denetako batek. Plazan nekez elkartuko diren bertsolarien arteko elkar ezagutza eta harremana indartzea ere izan da helburuetako bat. Egunak berak horretarako aukera eskaintzen du eta antolatu zituzten bi bertso saioetan ere ideia hori hartu dute aintzat.

Bazkalaurretik eta ondoren saioak
Bertsolari eta bertso mundukoak elkarrekin egoteaz gain bertsoak ere izan zuen bere presentzia. Bazkalaurretik eta ondoren saioak izan ziren. «Bestela plazan elkartuko ez liratekeenak elkarrekin kantuan jartzea izan da ideia nagusia» azaldu digu antolakuntzan ibili den bertsolarietako batek.



Publikoa, goizeko saioan.

Hala, goizean, Millan Telleria, Aroa Arrizubieta, Juan Joxe Eizmendi Loidisaletxe II. eta Maddi Aiestaran elkarrekin aritu ziren bertsotan. Arratsaldean, Aitor Bizkarra, Eusebio Igartzabal, Maddi Sarasua, Joxe Luis Gorrotxategi eta Aner Euzkitze aritu ziren. Xabier Amurizak propio egunerako jarritako koplak kantatu zituen eta Imanol Lazkanok ere bi bertso sorta kantatu zituen buruz.


Ezkerretik, Eusebio Igartzabal, Joxe Luis Gorrotxategi, Maddi Sarasua,
Aitor Bizkarra eta Aner Euzkitze.



Imanol Lazkano, bertso jarriak kantatzen Zerainen.

Jarraitzeko asmoz
Ia 100 lagun bilduta, datorren urtean ere jarraipena asmoz azaldu dira, urtero talde eta inguru desberdin batek antolakuntza ardura hartuaz.

(Argazkiak: Itxaso Mendiluze)