Bertsolari Txapelketa Nagusia 2022-09-22

Amuriza, Pagonabarraga, Alkaiza, Silveira, Illarregi eta Apalategi igandean, bigarren saioan

Bizkaiatik Gipuzkoara sartuko da Txapelketa Nagusia igandean eta Arrasaten izango du bigarren hitzordua igandean. Miren Amuriza, Gorka Pagonabarraga, Saioa Alkaiza, Xabier Silveira, Joanes Illarregi eta Iñaki Apalategi, Ander Aranburuk aurkeztuta. Gaztetasuna eta esperientzia biltzen dituen saioa da eta baita fase honetan bertsolari nafar gehien bilduko dituena ere.

Xabier Silveira lesakarra da taldeko zaharrena eta Txapelketa Nagusian parte hartze gehien dituena. 1997an kantatu zuen lehen aldiz eta seigarrena izango du aurtengoa. Semifinaletan kantatua da. Miren Amuriza berriztarrak laugarren Euskal Herrikoa du jarraian eta finalaren ataria gelditu zen duela bost urte. Iñaki Apalategi beasaindarrak hirugarren txanda du aurtengo hitzordua. Saioa Alkaiza Nafarroako txapeldun iruindarrak lehengo aldiz kantatuko du igandean Txapelketa Nagusian eta baita Joanes Illarregi leitzarrak eta Gorka Pagonabarraga durangarrak ere. Pagonabarraga da txapelketako bertsolari gazteena.

Lehenengo fasean eta finalaurrekoetan zazpi epaile ariko dira bertsolarien lanak epaitzen, fase bakoitzean epaile berak. Arrasaten ere honako zazpiok ariko dira: Egoitz Iradier Martinez de Albeniz, Eneko Bidegain Aire, Jurgi Fuentes Goikoetxea, Karlos Ibarguren Olalde, Leire Beloki Lizarralde, Miriam Juaristi Urizar eta Saioa Mitxelena Irazoki.

15 puntuagarri
Lehen fase honetan bertsolariek txapelketako ohiko lanak egingo dituzte. Denera 15 bertso puntuagarri, ariketa hauetan banatuta:
    Binaka, gaia emanda, hiruna bertso zortziko handian.
    Binaka, gaia emanda, hiruna bertso zortziko txikian.
    Banaka, lehen puntua emanda, hiru bertso zortziko txikian.
    Binaka, gaia emanda, hiruna bertso hamarreko txikian.
    Ganbarako lana: banaka, gaia emanda, hiru bertso nahi den doinu eta neurrian.

Sarrerak, eskuragai
Txapelketako sarrerak www.bertsosarrerak.eus atarian daude eskuragarri. Agortuko ez balira, saioaren egunean bertan leihatila 15:00etan zabalduko da. Saioa hasi baino orduerdi lehenago zabalduko dira ateak, 16:30ean. Sarrerak zenbakitu gabeak dira, beraz, garaiz ibiltzea gomendatzen da.