igandero 15:00etan ETB1en 2022-11-11

Hitzetik Hortzera txapelketaren barruko hotsetan

Idoia Torregarai eta Eider Perez Komunean  atalean izango ditugu saioaren inguruan hitz egiteko. Gainera, iritzia emango duten bertsolariak ere izango ditugu txapelketak iraun bitartean.

Leire Bilbao, idazlea

Heldu zein haur literaturan aritu da Leire Bilbao bere idazle ibilbidean. Behin bertsolari bati entzunda, etorria ez ezik irakurlearengan idatzitakoak ekarria ere izan behar duela dio. Haurren poesiaren defendatzaile sutsua da Leire, izan ere, ume batek bere lehen egunetatik jasotzen duen literatur generoa oso gauza poetikoa izanik, kantagarria eta erritmoz betea izan behar duela azpimarratzen du, ezereza dagoen tokitik hitzarekin bakarrik, zerbait berria sortuz.

Durangoko azokaren harira, euskal produkzio oparoa dagoela dio. Gaineratu du, kultura maite duen publikoaz inguratuta, aspadiko lagunak, zaharrak zein berriak topo egiteko momentu ederra izango dela Landako gunea.

Bertsotan zein gai jartzaile moduan aritutakoa da gure aste honetako protagonista. Garai zoragarriak ditu gogoan, Jon Lopategirekin eskolaz eskola, Xabier Amurizarekin kopletan edota Azpillagarekin Mutrikun entrenatzen aritu zenekoak besteak beste.

Barruko Hotsak, Euskadi literatura saria

Bigarren aldiz jaso du haur eta gazte literaturaren atalean bigarren sari hau. Haurrentzako poema liburu ilustratua da Barruko hotsak. Begiekin entzuteko eta belarriekin ikustekoa. Maite Mutuberriak egin ditu ilustrazioak, Xabier Zabalak aldiz, soinu banda.

Durangoko bertsoaldi onenak

Igandeko programan bezperako saioko bertsoaldi onenen aukeraketa ikusteko aukera izango da. Larunbatean jokatuko den saioan honako bertsolari hauek hartuko dute parte: Aitor Bizkarra, Aitor Mendiluze, Beñat Gaztelumendi, Eñaut Martikorena, Julio Soto eta Saioa Alkaiza. Gai jartzaile lanetan berriz, Ane Ezenarro arituko da.