Ibiltaria, 2018tik aurrera 2022-11-22

Bertso Eguna urtarrilaren 28an, Azpeitian

Bertso Eguna urtarrilaren 28an, Azpeitian

Bertso Eguna urtarrilaren 28an izango da, Azpeitian, Bertsozale Elkarteak gaur iragarri duenez. Hamarkada askotan Donostian egin ondoren, 2018tik ibiltaria da Bertso Eguna, urtero aldatzen da herriz. Aurtengoa Izpuran egin zen.

«Egun osoko plana ari gara antolatzen, pandemia aurretik egin ohi genuen bezala» adierazi du Bertsozale Elkarteak Bertsozale.eus gunean. 11:30ean elkartu eta kalez kaleko poteoa egingo da, libreko bertso saio irekiekin. Ondoren, 14:30ean, bertso bazkariak egingo dira zenbait elkartetan: Oilo Soro, Zulo Zabal, Ziripot, Oilagorra eta Txalintxo elkarteetan. «Gainera, gustu guztiak asetzeko moduan, mota ezberdineko bertso saioa eskainiko da horietako bakoitzean: libreko saioak, bertso saio musikatuak edota gaiekin eta bertso jarriekin osatutakoak». Arratsaldean poteoa izango da, eta 21:00etan afaria eskainiko da Elikagunean. Afalostean izango da bertso ekitaldia Elikagunean bertan.


1968tik antolatzen
1968an hasi zen antolatzen gaur egungo Bertso Egunaren aitzindaria, Txapelketan Xalbadorri txistuak jo ondorengo urtean, txapelketa antolatzeari utzita. Hasiera batean, Bertsolari Eguna izena hartu zuen, eta garaiko hainbat bertsolariren omenaldi eguna izaten zen. 1987an Bertsozale Elkarteak hartu zuen antolatzeko ardura, betiere Donostiako Udalarekin elkarlanean. 1995ean omenaldi kutsua alde batera utzi eta bestelako itxura hartu zuen egunak; izena ere aldatu zitzaion, eta Bertso Eguna izatera pasa zen.

Donostian egin zen urte luzez, eta 2017ko etenaren ondotik eta 2018tik aurrera, Euskal Herri osoan mugitzen den egitasmo ibiltaria da egun, Bertsozale Elkartearen oinarrizko helburuekin bat eginez: herrialde osoan eragitea. Pandemiak eraginda 2021ean eta 2022an data eta egiteko modua aldatu baziren ere, Bertso Egunak egin ahal izan ziren. 2023an, urtarrilera eta egun osoko planera itzultzea da asmoa.

Albiste gehiago

Ganbaran bai - Aitor Sarriegi 2022-11-28

Baga, biga, higa... Lauga!

Aitor Sarriegi Galparsoro

Nerea Ibarzabal - Balorazioa 2022-11-27

«Oso sentsazio onekin egon naiz kantuan, kontzentratuta»