Aitor Bizkarra Ruiz - Elkarrizketa 2022-11-22

«Alderdi diskurtsibotik pendiente daukat nire posizioa bertsotan nola adierazi asmatzea»

Jexux Mari irazu

Aitor Bizkarra Ruiz (Abadiño, 1996) Txapelketa Nagusiko finalaren langa izan daitekeen muga horretan kokatu da bere lehenengo parte hartzean, 1.329 puntu eskuratuta. Bere lanak eginda, Baiona eta Bilboko emaitzak argituko du finalean sartuko den ala ez.

Amurrion, Durangon ez bezala, ofizioetako lanekin gelditu zen beteen eta baita puntu erantzunekin ere. Bakarkakoak gehiago utzi dio gazitik. Txapelketa osoko lana eta emaitza baloratzeko eskatuta, oso gustura dago dagoela adierazi du, ez zuelako inola ere uste bide hau guztia egin ahalko zuenik. Era berean, eginak eta egitekoak parean jarrita, txapelketatik hobetzeko koska batekin doala dio eta horrekin gelditzen dela.

Bere bertsokera ikuspegitik, uste du «bertsoa hiztegi errimatu bat baino, izatekotan, hizkuntza errimatua dela» eta ideia horrek gidatzen du Bizkarraren bertso lanketa alderdi teknikoari dagokionez. Edukira jota, «alderdi diskurtsibotik pendiente daukat nire posizioa bertsotan nola adierazi asmatzea, bide urraketa baten antzekoa izango delako» azaldu dio Bertsoa.eus-i.

Zazpi egunetan bi finalaurreko jokatu ditu Aitor Bizkarrak, Durangon eta Amurrion, eta osasunean ere antzeman du hori. Finalera begira zalantza gunean egonik, lanean jarraituko du lasaixeago bada ere eta larunbatean Baionakoa jokatuta bere burua aukera handiekin ikusten badu orduan hasiko da beste gauza batzuek pentsatzen.