Aitor Mendiluze Gonzalez - elkarrizketa 2022-12-07

«Finaletan, Donostian, Barakaldon eta Iruñean kantatzera iristea zoragarria da»

Aitor Mendiluze Gonzalezek (Andoain, 1975) Txapelketa Nagusiko bere seigarren finala jokatuko du, Iruñean, abenduaren 18an, Durangoko finalaurrekoa irabazi eta Bilbon bigarren eginda. Puntuazio langan bigarren koxkan sartu da finalera, Alaia Martinen atzetik.

Egungo txapeldunordea gustura aritu zen bertsotan Bilboko finalaurrekoan, bereziki ofizioetan eta puntu erantzunetan. Bakarkakoan ere, orokorrean gustura, baina nahi beste borobildu ez izanaren arantzatxoarekin gelditu da, bere hitzetan.

Finalaurrekoetan izandako gorputzaldi onari jarraipena ematera joango da finalera. Bere bertsokera, bere pentsakera erakustera joango da eta nahiko luke bakarkakoak gehiago kargatzea edo borobiltzea.

Finaleko argazkia zoragarria iruditzen zaio eta «ilusioa piztuko duen finala» izango dela uste du. Gauza eder asko emango dituena.

Aitor Mendiluzek zazpigarren Txapelketa Nagusia du, 1997an hasita. 2001ean sartu zen lehenengoz finalera Donostiako Belodromoan. Hirugarren postua eskuratu zuen orduan, Egaña eta Lujanbioren atzetik. Geroztik BEC-eko final guztietan egon da 2017an buruz burukora sailkatu zen Maialen Lujanbiorekin. 2022koan, Iruñean kantatuko du. Ibilbide hori oholtzan egin ahal izatea ohore handia dela aitortu du Mendiluzek, eboluzio hori barrutik bizitzeko aukera izan duelako eta baita bere eboluzioa txapelketan islatu ahal izateko ere.