Ione Narbaiza -Bizkaiko Bertsolari Txapelketako Antolakuntza Taldeko kidea 2023-04-25

«Eguen arratsalde-iluntzeak kulturaz gozatzeko momentu bikainak izan daitezkeela deritzogu»

Udabarria Bertsotan Bizkaiko Txapelketako sailkapen faseak maiatzeko eguenak bertso hitzordu bihurtuko ditu, Bizkaiko Bertsozale Elkartearen eskutik. Hitzordu bikoitz gainera, egun berean bi saio jokatuko baitira. Sarrerak eskuragarri daude jada www.bertsosarrerak.eus gunean.

Zenbakietan: 48 bertsolari kantuan, 14 laguneko Talde Antolatzailea, 15 epaile eta 8 gai-jartzaile, beste 8 laguneko komunikazio taldeak hauspotuta.

Bertsoa.eus-ek Ione Narbaiza Bizkaiko Bertsozale Elkarteko eragile eta Talde Antolatzaileko kidearengana jo du datorren astean hasiko den sailkapen faseri buruzko argibide eske.

Maiatzaren 4an hasiko da Udabarria Bertsotan, Bizkaiko Txapelketako sailkapen fasea. Nola dator aurtengoa?
Badator, eta gogotsu hartuko dugu. Bizkaiko eskualde denetako 48 bertsolari izango ditugu. Beraz, kopuru horri erantzunez, 6 bertsolariko 8 saio izango ditugu, bi multzotan.

Bertsolariak A eta B multzoetan banatuko dira eta zortzi saio horiek lau egunetan jokatuko dira: egun eta ordu berean, herri banatan eta gai berdinekin.

Kanporaketak eguenetan izango dira 2021eko esperientziari jarraiki. Txapelketako sailkapen fase osoa aste barruan kokatzen bidea urratu duzue Bizkaian...
Bai… Aurreko txapelketa oso berezia izan zen pandemiaren eraginez, eta urte bitan banatu behar izan bagenuen ere, txapelketa egitea lortu genuen.

Udabarria Bertsotani dagokionez, saioak 2020ko maiatzeko asteburuetan egiteko antolatu bagenituen ere, azkenean irailean eta astean zehar egin behar izan genituen, asteko hiru egun erabilita. Dena dela, zailtasunak zailtasun, Udabarria bertsotan egitea lortu genuen, eta fase honetako saioak astegunez egitea ondo baloratu genuen, gainera.

Horregatik, aurten, horrela antolatu ditugu saioak hasieratik. Kasu honetan, asteko egun bakarra erabiliko dugu, eta saioak eguen arratsaldeetan izango dira. Eguen arratsalde-iluntzeek badute asteburu usain apur bat eta kulturaz gozatzeko momentu bikainak izan daitezkeela deritzogu.

Sarrerak salgai daude dagoeneko www.bertsosarrerak.eus gunean… Saioan bertan ere izango dira agortu ezean?
Hori da, sarrerak salgai daude dagoeneko; 3€ da ohiko sarrera, 2€ bertsozale elkarteko bazkideentzat eta sarrera doakoa da 18 urtetik beherakoentzako. Txarteldegiak saioak hasi baino ordu erdi lehenago zabalduko dira, beti ere sarrerak geratzen badira. Gazteen sarrerari dagokionez, kontutan izan behar da, nahiz eta doan izan web gunean gonbidapena hartzea komeni dela, aforoengatik.
 
Udazkeneko zerrenda noizko izango da osatuta?
Udabarria Bertsotaneko azkenengo saio bien ondoren jakinaraziko dugu zein bertsolarik hartuko duen parte Bizkaiko Bertsolari Txapelketan. Batetik, Udabarria Bertsotanetik nortzuk sailkatu diren, eta bestetik, aurreko txapelketan finalaurrekoetan edo finalean kantatu zutenetatik zeintzuk eman duten izena.

Bertsozaleei gonbidapena saioetara joateko…
Sailkapen faseko saioak formatu txikiko saioak dira eta badute erakarpena. Bereziki aurpegi berriak, bertsolari gazteak, entzuteko aukera ematen duelako.