Izen-ematea zabalik 2023-10-03

XXI. mendeko bertsolaritzari buruzko Ikastaroa UNEDen

XXI. mendeko bertsolaritzari buruzko ikastaroa eskainiko du UNEDek udazken honetan, Asmoz Fundazioarekin lankidetzan. Xabi Paya bertsolariak gidatuko du hamasei orduko formakuntza. Bi orduko sei saio izango ditu, online. «Unibertsitate mailan gaur egun ez da bertsolaritza ikergai duen ikasgairik ez titulurik. Ikastaro honek, bere txikian, hutsune hori betetzeko lehen mugarria izan nahi du» dio ikastaroaren informazioak.

Ikastaroaren helburuak
XXI. mendeko bertsolaritzari buruzko ikastaroak hiru helburu nagusi izango ditu:

- Bertsolaritza XXI. mendean ulertzeko irizpideak eta gakoak ezagutaraztea.
- Bertsolaritzaren mugimendua testuinguratzeko baliabideak ematea.
- Egungo bertsogintzaren teknikak eta joerak ulertzeko tresnak eskuratzea.

Sei lan saio
Ikastaroak bi orduko sei lan saio izango ditu. Lehen saioan bertsolaritzaren oinarri nagusiak azalduko dira. Bigarrenean bertsolaritzaren historiaren errepasoa egingo dute. Hirugarrenean, ikerketarako langai garrantzitsuak diren bertso-paperak aztertuko dira. Laugarren eskolan bat-bateko bertsogintzan jarduteko tekniken inguruko azalpen praktikoak izango dira nagusi. Bosgarren saioan ikasleak bertsozale kualifikatuaren paperrean arituko dira, bat-bateko bertso-saioak interpretatzeko eta hobeto ulertzeko tresnak baliatuz. Azken saioan, bertsolaritzaren egungo iker-lerroen berri jasoko dute ikasleek.

Urriaren 16tik azaroaren 20 bitartean
Formakuntza urriaren 16 eta azaroaren 20 artean egingo da eta asteko saio bateko maiztasuna izango du. Bi ordutako 6 saiotan banatuko da formakuntza eta saio guztiak teorikoak izango dira. 17:00etatik 19:00ak arte izango dira saioak. Saio bakoitzaren ondoren, ikasleek test bat edo ariketa sorta labur bat egin beharko dute, saioan landutako edukien osagarri.

Doako ikastaroa
XXI. mendeko bertsolaritzari buruzko ikastaroan izen-ematea doakoa da. Informazio xehea hemen aurkituko duzu. Izena emateko lotura, hementxe.