Larunbatean, 21:00etan ETB1n 2023-10-19

Odieta, Lazkao eta Iurretako bertsoak eta Itxaso Paya Hitzetik Hortzeran

Odieta, Lazkao eta Iurretako bertsoak emango ditu Hitzetik Hortzerak aste honetan. Odietan, Esan Erran irratiaren 25. urteurrenean antolatu zen bertso musikatuen saioko bertsoaldiak izango ditugu aste honetako Hitzetik Hortzeran. Maialen Lujanbio, Julio Soto eta Nerea Ibarzabal aritu ziren kantuan; Iñigo Ibarraren esanetara eta Ixak Arruti eta Gari Otamendi musikariek lagunduta.



Lazkaon Amets Arzallus, Nerea Elustondo, Oihana Iguaran eta Andoni Egaña aritu ziren kantuan Iker Iriartek gaiak jarrita. Iurretan berriz Nerea Ibarzabal, Miren Amuriza, Unai Iturriaga, Amets Arzallus, Joanes Illarregi eta Maialen Lujanbiok kantatu zuten. Maite Berriozabalek gidaturiko saioan.



Itxaso Paya gonbidatua
Aste honetan Itxaso Paya bertsolaria eta beste hainbat alor desberdinetan aritua eta aditua elkarrizketatuko du Mirari Martiarenak. ALBEko bertso eskolako kideak, Maria Riverorekin batera, azaroaren 26an estreinatuko du `eMCumeak´ satira musikala. Euskal emakume sortzaileen errealitatea umorez oholtzara eramatea eta ikusgarri egitea da euren asmoa. Getxon estreinaldia egin ondoren Euskal Herrian barrena ibiliko dira antzokiz antzoki.



Urriaren 21ean ospatuko diren BEST jaialdiari buruz ere arituko dira Itxaso Paya eta Mirari Martiarena. Bizkaiko Emakume Sortzaileen II. Topaketak antolatzen buru belarri ari baita Zelako Kultur Ideiak Kooperatibako lantaldearekin. Iaz sortu zituzten topaketa hauek, Bizkaiko emakume sortzaileen sarea osatzeko, ezagutzeko eta kezkak elkarbanatzeko topagune bat sortuz. Egun guztiko egitarauaren barruan bertso saio berezi bat ere antolatu dute. Bertsopotorrea deitu diote, bertsoa eta stand-up-a uztartuko dituen emankizuna izango da.