Debagoienan hasi eta bukatuko da ekimena 2024-02-27

Gelatik Plazara: abian da harrobia lantzeko proiektuaren bigarren edizioa

Gipuzkoako Bertsozale Elkarteak Gelatik Plazara ekimena jarri zuen iaz abian «tokian tokiko bertso eskoletako ikasleek elkar ezagutu eta gela barrutik plazara jauzi egiteko zubi lana helburu».

Iaz arrakasta handia izan zuen eta 170 gaztetxok hartu zuten parte ekimenean. Proiektuak berez sariketa formatua du. Iaz eskualdeka planteatu zen eta aurten beste itzuli bat eman diote, finala egun eta herri bakarrera ekarrita.

Debagoienan hasi eta bukatuko da ekimena. Oñatin abiatuko da ostiral honetan eta Aretxabaletan amaitu apirilaren 28an, Gipuzkoako Bertso Eskolen Egunean. Eskualdeari aitortza eta bultzada eman nahi izan zaio bi ekimenokin, besteak beste aurten baitira 50 urte bailaran Almen bertso-eskola sortu zutela, hezkuntza proiektuari lotuta.

Lehenengo bederatzi saioak martxoan zehar izango dira Gipuzkoako eskualde desberdinetan barrena.