Gipuzkoako Bertsolari Txapelketa 2024 2024-09-06

Gipuzkoako Txapelketa «sendo» eta «indartsua» helburu, Bertso-eskolen big-bang lurretan aurkeztuta

Gipuzkoako Bertsolari Txapelketa aurkeztu zuten atzo, haurren bertso-eskolak modu planifikatuan sortu eta zabaldu zituzten Leintz bailaran, Apotzaga auzoan. Bertso-eskola hartako sortzaileak, ikasleak eta txapelketako bertsolariak zein alderdi teknikoko kideak bildu zituen Gipuzkoako Bertsozale Elkartearen hitzorduak.

Duela mende erdikoa ez baitzen bertso-eskola baten sorrera bakarrik izan. Umeak bertsotan ikasten zutela jabetuta, esperientzia hori Euskal Herri osora zabaltzeko erabaki ausartak hartu eta pauso zehatzak eman zituzten Patxi Goikolea, Juanito Akizu, Santi Iparragirre eta ingurukoek. Bertso-eskoletan ez ezik, bertsolaritza ikastetxeetara zabaldu zuten, Ikastolen Elkartearen eskutik.

50 urte beranduago, Gipuzkoako Txapelketa parte hartuko duten bertsolari guztiak bertso-eskolatik datoz eta hori azpimarratu zuen Mikel Artola Gipuzkoako Bertsozale Elkarteko koordinatzaileak aurkezpenean. Eta aitzindarien zenbait irakaspen azpimarratu zituen Artolak: bertsolaritzarekiko zaletasuna eta pasioa transmititzen asmatu izana, taldetasunaren balioa eta bertsolaritzaz harago, bertsolaritza kultur proiektu batean kokatuta garatu izana duela mende erdi.

25 urtez beheko bertsolari onenari saria
Maria Ortega Gipuzkoako Txapelketako komunikazio arduradunak iragarri zuen aurten 25 urtez beheko bertsolari onenak saria izango duela, finalean bertan emango dena. Urteurrenaren testuinguruan kokatuta dator sari berri hau. Hamar bertsolari dira adin tarte horretakoak eta beraz sari hau irabazteko hautagai.

Bestalde, Eñaut Zubizarreta Trigger taldeko musikariak sintoniaren nondik norakoak aurkeztu zituen.

Bertsoa.eus-ek testigantza ugari bildu zituen atzoko aurkezpenean eta datozen egunetan joango da sarean zabaltzen: aurkezpeneko hitzak, Patxi Goikoleari elkarrizketa, parte hartuko duten bertsolarien hitzak, umeen bertsoak eta abar.

Debagoienako bertso-eskola derberdinetako haurrek ere jarri zuten beren etorkizun alea eta kopla ederrak kantatu zituzten txapelketaren inguruan, publikoari barreak eta txaloak atereaz.